ATA y AEF a firma acuerdo nobo pa tres aña

Ayera mainta durante un conferencia di prensa CEO di Aruba Tourism Authority, Ronella Croes, a firma un acuerdo di tres aña cu Aruba Excellence Foundation (AEF). Di e forma ey ATA ta compromete su mes na sigui brinda apoyo y e sosten necesario na e fundacion y Aruba Certificacion Program.

Croes a remarca cu ora ta papia di turismo, ta importante pa pensa con por stimula un desaroyo duradero y den esaki ATA tin diferente papel. Como ATA nan ta facilita diferente desaroyo of aspecto cu ta cuadra den un desaroyo duradero. “Nos ta inverti of nos ta pusha pa cosnan cu nos kier pa sucede pa asina guia e desaroyo den e direccion debido of cosnan kizas cu nos no kier pa sucede,” el a indica.

ATA ta hunga diferente papel den e contexto aki. Croes a subraya cu no ta importa kico e punto di enfasis ta, tres punto ta keda cardinal ora cu ta papia di turismo y esakinan ta e fundeshi di producto Aruba. E fundeshi aki ta consisti di sigura cu e na e isla seguridad ta keda na ordo y cu por keda ofrece esaki na e bishitantenan, e calidad di e playanan, cu ta un di e cosnan cu ta destaca durante di un vacacion na Aruba y por ultimo ta e hendenan, e parti di hospitalidad cu Aruba ta ofrece y e nivel di servicio cu Aruba ta ofrece na e bishitantenan.

El a sigui splica cu tin diferente manera con ATA ta contribui na e tres aspectonan aki cu ta parti di e fundeshi. Por ehemplo, pa loke ta trata seguridad, ATA ta sostene Aruba Hospitality & Security Foundation cu ta encarga cu diferente proyecto dirigi specificamente ariba e area turistico y den colaboracion cu KPA, entre otro.

Pa loke ta e playanan di Aruba, ATA tin diferente inversion cu ta tuma luga, proyectonan for di Arashi te cu Baby Beach. Y por ultimo pa loke ta trata e hospitalidad y nivel di servicio,Croes a enfatisa cu e manera mas grandi cu ATA ta contribui na esaki ta pa medio di nan sosten na e fundacion Aruba Excellence Foundation.

For di 2011 ATA ta duna su aporte na e programa di certificacion conoci como Aruba Certification Program (ACP). E programa a celebra su di 11 aniversario aña pasa y na 2018 a evalua kico ta e miho manera pa sigui duna realse na e programa aki, sigui ofrece, pero tambe sigui evoluciona conforme locual e mercado ta rekeri, pero tambe conforme cu e tendencianan den turismo internacional.

Na 2018 a institui e fundacion Aruba Excellence Foundation y desde e momento ey tin un hunta di supervision cu ta guia e trabaonan di e fundacion aki contando cu un ekipo cu ta consisti di un director y diferente facilitador.

“Nos ta hopi satisfecho, nos a evalua e ultimo periodo, por mira cu for di 2018 te cu 2022 a certifica un total di seis mil persona den sector turistico, pero tambe pafo di e sector turistico.

No solamente a keda ofrece e Aruba Certification Program, pero tambe a crea curso- y entrenamentonan nobo, y tambe a crea plataformanan nobo pa provee esaki pa esnan cu ta interesa y stimula pa mas hende cu ta posible pa participa,” Croes a indica.

Por ultimo, Croes a resalta, un di e trabaonan cu te cu aworaki cu ta hopi importante, ta e hecho cu a pone enfasis na drenta scolnan na unda studiantenan ta forma parti di esnan certifica. El a splica cu e intencion di ATA conhuntamente cu e fundacion ta pa turismo ta parti di e curiculo escolar. “E ta asina importante cu bo no por neglisha esaki y nos tin cu pone enfasis pa trece e conocemento y conscientisacion for di hoben caba,” el a destaca.

Croes a subraya cu pa ATA ta hopi importante pa continua cu e colaboracion cu Aruba Excellence Foundation den e mesun formato aki y pa e motibo ey e dos organisacionnan a yega na un acuerdo na unda ATA ta continua cu e aporte aki pa un periodo di tres aña.

“Nos ta gradici e ekipo completo di Aruba Excellence Foundation, tambe e hunta pa e trabao desplega, y tambe gradici tur esnan cu ta haci uso di e plataforma aki pa asina certifica y na final di dia mehora e nivel di servicio di tur esnan cu ta traha den e sector of pafo di e sector tambe,” el a bisa.

Croes a felicita e fundacion tambe pa tur e logronan alcansa durante e ultimo periodo y a menciona cu nan tin diferente meta cu ta refleha e continuacion di e logronan aki. Tur esaki, el a señala, ta mara na e cantidad di certificacion cu nan tin den bista pa e proximo añanan.

El a indica cu den un scenario optimista, nan lo desea di logra tres mil persona certifica e aña aki. “Esaki ta sibri pa esnan cu ainda no ta haci uso di e programanan cu ta wordo ofreci pa nan ta conciente di esaki y duna esaki e prioridad debido,” el a finalisa.

Shadey Figaroa, directora di e hunta di Aruba Excellence Foundation (AEF), a ratifica cu e fundacion ta contento di por firma un acuerdo un biaha mas cu ATA pa asina sigui cu e trabao cu AEF ta bin ta haci den e transcurso di añanan, pero tambe pa por traha riba trayecto y programanan nobo.

“E apoyo di ATA no ta solamente e parti financiero, pero sigur tambe e parti di respaldo di e certificacion,” el a renarca.

Figaroa a splica cu AEF ta evoluciona y ta keda adapta na e necesidadnan den e mercado pa asina posiciona su mes como un instituto di aprendisahe y desaroyo. El a splica cu den Caribe, Aruba y Bahamas ta e unico dos isla cu tin un programa di certificacion. Na Bahamas esaki ta mara na permiso pa por traha den e sector di hospitalidad, pero e programa di Aruba ta un stap mas dilanti den loke ta trata contenido.

Pero AEF tambe lo desea di mira cu na Aruba e lo wordo mara na permiso pa asina por sigura cu tur hende cu ta traha den e sector hotelero y di hospitalidad ta certifica.

Figaroa a sigui splica cu den e prome kwartaal di 2023, 50% di e participantenan tabata di e sector hotelero, 23% di e sector di educacion y 18% ta bin di companianan di tour. E fundacion ta spera cu nan por yega e metanan delinea pa 2023 te cu 2025 den cantidad di persona cu lo certifica den ACP.

El a menciona tambe cu pronto nan ta bay cuminsa cu e prome sesionnan di un programa di ACP modernisa y den esaki nan lo sigui enfoca riba e zjeito di ACP y tambe habilidadnan cu e hendenan mester pa por duna e servicio na e bishitantenan.

Manera ya caba menciona, e fundacion ta bezig cu proyectonan den e sector di educacion. Figaroa a splica cu Sint Paulus School ta pasticipando den un programa piloto cu ta encera cu muchanan di eerste te cu zesde klas ta haya ACP na scol y na momento cu nan caba basisschool nan lo ta certifica.

“AEF ta hopi contento cu e desaroyonan aki y nos ta gradici ATA tambe y tur cu ta participa den tur sector, danki pa nan aporte y nos ta spera di sigui conta cu mas persona cu lo certifica nan mes den e proximo añanan pasobra e ta hopi importante pa nos isla,” el a finalisa.