‘ATA uza como modelo pa autoridad di turismo di St. Lucia’

St. Lucia lo institui un autoridad di turismo inspira pa esun di Aruba, segun ministerio di Turismo.

Esaki nan a treci dilanti den un reunion di Agnes Francis presidente di e Tourism Board di St. Lucia cu minister di Turismo.

Segun e relato di ministerio di Turismo, gobierno di St. Lucia a tuma e decision pa crea un structura nobo pa e maneho di turismo, pues nan ta den e proceso di crea/diseña un autoridad di turismo. “Pa haci esaki posibel St. Lucia a sondea rond mundo pa mira e diferente tipo di modelonan cu ta existi, a keda hopi impresiona cu e modelo di Aruba”, asina e ministerio ta informa.

E relato ta sigui cu ta Importante pa menciona ta cu Aruba ta depende riba turismo hopi mas cu St. Lucia y mirando cu awo nan ta bay cuminsa conoce expansion den e area aki, nan a ricibi informacion hopi valioso di Aruba. “Un ehempel ta e ley conoci pa “All – Inclusive”, como na St. Lucia tambe ta mirando e desaroyo aki ta aumentando. Segun Sra. Francis ya nan ta na 50% di All inlcusive y ta consciente cu mester cuminsa regula esaki, manera cu Aruba a haci”, e ministerio di Turismo di Aruba ta laga sa.