Ayera mainta presidente di hunta di supervision di Oficina di Turismo di Aruba (ATA), sr. Jossy Lacle a abstene su mes di papia tocante e supuesto motibo (nan) cu a conduci cu Ahata a retira su tres miembronan fei di e hunta aki. Tambe el a abstene su mes di drenta den e discusion entre gobierno y Ahata rond di e topico di All Inclusive.
El a prefera di papia y duna un splicacion con ley di ATA ta hinca den otro, ora cu e instancia aki a bira independiente como empresa Sui Generis fei 5 aña pasa. Tambe el a referi tocante e tarea cu e hunta di supervision di ATA tin. Den e caso aki e ta considera cu e funcionamento di ATA ta esun primordial pe.
Ley ta prevalece
El a bisa cu tur decision cu nan ta tuma pa hancra strictamente den e ley cu ta regarda ATA. “E ta traha a base di ley”, el a bisa. Den e ley aki mes ta para cu ATA SG mester ehecuta e maneho di turismo cu e minister di e cartera aki ta pone su dilanti. Tur aña nan ta bini cu un maneho di turismo en general pa Aruba prepara dor di minister di Turismo. Esaki ta bay den e plan di ATA pa wordo ehecuta, el a laga sa.
Tambe el a indica cu e miembronan di e hunta aki ta traha profesional, buena fe y cu bienestar di turismo den general na pecho. “Hunta di directiva ta traha na bienestar di e instituto ey”, sr. Lacle a bisa. Tambe el a agrega cu tur miembro di e hunta di supervision di ATA ta sali fei punto di bista cu nan ta funciona profesional.
Igualmente el a bisa cu tur decision y maneho financiero, entre nan e presupuesto anual di ATA, ta cumpli cu tur ruta cu e ley di ATA mes ta prescribi. Gerencia di ATA ta esun cu ta presenta e presupuesto na e directiva cu mester di aprobacion di e mayoria di e hunta di supervision. Tambe minister di Turismo mester duna su aprobacion, pero prome e ta mande 10 dia pa Parlamento di Aruba.
El a ripiti cu tur e proceduranan aki ta hancra den ley. “No ta a nos cu ta pense, no ta nos cu ta traha asina, ta e ley ta bisa con nos mester funciona”, segun sr. Lacle.
Relacion cu minister
Un alegacion cu a sali den prensa ta tocante un supuesto metemento directo di minister di Turismo den maneho di ATA. Sr. Lacle a bisa cu pa e hunta di supervision y pa gerencia di ATA, nan relacionnan di trabou di ATA cu minister di Turismo ta hancra den ley y den regulacionnan cu nan mes a traha tambe. “E tabata prescribi den e ley, pero nos a traha e regulacionnan con pa funciona segun ‘corporate governance’ ”, el a bisa.
Control
Sr. Lacle a haci enfasis cu ATA ta un compania “hopi bon controla”. Regularmente nan ta pasa den audit interno pa instancia externo y bou standard di control internacional basta stricto. Te hasta analisis di riesgo ta wordo haci riba e proyectonan y inversionnan cu ATA ta haci a base di un plan.
Sr. Lacle a señala cu ATA su relato financiero anual ta uno basta extenso y controla externamente pa instancia independiente. Di e forma aki sr. Lacle di un forma sutil ta sali dilanti riba cierto suposicion no oficial cu Ahata a retira su miembronan pa mal maneho di fondo den ATA.
Presidente di hunta di supervision di ATA, a laga sa cu e carta cu nan a ricibi for di Ahata no ta wordo bisa e motibo (nan) pa kico nan ta retira nan. Igualmente el a indica cu Ahata no ta obliga pa specifica esaki, ya sea cu nan tin motibonan personal of no. E ta spera cu e situacion cu a surgi lo wordo normalisa pronto mirando e responsabilidad cu ATA mester carga.
El a indica cu esfuersonan ta wordo haci y e comunicacion cu Ahata ta sigui pa nan manda nan miembronan den e hunta aki. El a bisa cu minister di Turismo a haci un solicitud pa mas pronto posibel Ahata lo presenta su candidatonan pa yena e vacaturanan aki. Sr. Lacle a abstene di cay den speculacion riba kico lo sosode si Ahata ta dicidi rotundamente di sali afo for di hunta di supervision di ATA.
