Actualmente Oficina di Turismo di Aruba (ATA) ta trahando riba nan presupuesto di 2018. Ya caba nan a delinea diferente fondonan cu lo ta directamente dirigi pa ehecucion di e plan pa desaroyo di destinacion Aruba, considerando cu legalmente ATA por responsabilisa su mes pa cierto inversion.
CEO di ATA, Ronella Tjin-Asjoe-Croes a bisa cu esaki ta un proceso hopi extenso, ya cu nan ta duna hopi importancia na e aspecto di traha claramente nan presupuesto. “Pa nos sigura cu e hunta tin tur e conocemento y instrumento pa por cana e trayecto di funciona como miembro di e hunta di supervision di ATA”, el a declara na Bon Dia Aruba.
Ya caba hopi reunion a tuma luga cu e miembronan di e hunta di supervision, despues cu e crisis presenta caminda AHATA cu a retira su miembronan, y cu finalmente a wordo supera. Nan a reuni caba cu e diferente comisionnan, y practicamente nan ta aworaki den e fase final di elaboracion di e presupuesto pa e keda entrega na e hunta no mas tarda cu 1 di augustus .
Pa ley, ATA tin te cu 1 di september, pero e aña aki nan a dicidi di acelera e proceso considerando tambe cu tin eleccion na caminda dia 22 di september awor. Nan ta haya cu ta oportuno pa nan por acelera e proceso aki pa bin cla cu ne mas lihe posibel, pa asina ATA por ta mas sigur of hisa e chens cu nan por tin nan presupuesto aproba poniendo bista riba 2018.
Sra. Tjin-Asjoe-Croes a declara cu documentacion tambe a keda presenta caminda hopi lihe e miembronan di e hunta a duna di nan banda na tur momento pa por sigura cu mientras cu ta cana e trayecto ey, ATA por sigui cana y cumpli cu su responsabilidad. “Esey sigur ta hopi di aprecia mirando e importancia di un instituto como ATA”, el a bisa.
