Despues cu 2017 a termina den un bahada di 2,9% di turismo (1.070.548 stay-over visitors total), oficina di turismo di Aruba ta spera un mehoracion di 3,7% p’e aña aki. Factor importante pa e bahamento aña pasa ta e mercado di Venezuela cual a baha hopi mas, mas cu 50% en bes casi 23% cual ATA a pronostica.

Director Ronella Tjin Asjoe ta informa prensa diamars di e cifranan pero tambe un poco di e strategia pe siguiente añanan. E enfoke ta keda riba crecemento di turismo sinembargo e ta bisa cu ATA ta consciente di e presion di turismo riba nos isla.
Asina e ta contesta riba preguntanan di Bon Dia Aruba. E ta bisa cu ATA lo conduci diferente estudio pa indica cua areanan ta bou presion y unda ainda por crece. E prome resultadonan por spera na mei, asina e director ta informa.

Tambe lo conduci estudionan unda tin ‘niche’, esta mercadonan chikito cu por atrae turistanan. E oficina tambe a presenta cifranan di e ultimo shete aña unda por mira un crecemento averahe di 2% di e cantidad di turistanan cu ta keda riba nos isla, y mas importante tambe un crecemento averahe di 2% pa entrada di turismo (tourism receipts). E ultimo ta un prioridad pa e oficina y tambe maneho di gobierno, pa purba haya mas entrada di turistanan y asina no ta enfoca solamente riba e cantidad di bishitantenan cu tambe tin su efectonan negativo riba nos isla (beachnan druk, mas trafico, etc.). Pasobra segun e director ATA kier un turismo duradero na final.

Aunke e cantidad di turistanan a baha aña pasa, Banco Central si a midi un crecemento di 5% den e entrada di turismo. Pa 2018, ATA ta proyecta un crecemento di 2% di e total di tourism receipts. Merca Manera indica na 2017 e cantidad di turistanan cu a keda drumi, a baha. Pero si ta exclui e mercado di Venezuela, por mira un aumento di 9,1%. E cantidad di bishitante for di e continente Norte Americano tawata un total di 742.884, un aumento di 10,7% ekivalente na 72.060 bishitante adicional den 2017. ATA ta spera un crecemento di 3,7% pa 2018.

Durante 2017 e mercado Norte Americano a representa un 69,4% di nos Turismo. Merca ta permanece como e mercado turistico principal den 2017 subiendo su market-share cu 10,6% ekivalente na 66.953 turista adicional mustrando un crecemento fuerte na 2017. Pa 2017, Canada a percura pa 47.166 bishitante. Despues di retonan economico den 2016, Canada a recupera durante 2017, mustrando un crecemento di 12,1% of 5.107
turista Canades mas cu a bishita nos isla, asina ATA ta informa.

Latino America
2017 tabata un aña den cual Latino America a representa 18.9% di nos turismo stay-over. E continente a trece un total di 202.776 bishitante cual ta un bahada di 32,9% (99.233 bishitante menos) compara cu 2016. Esaki ta debi na un caida di 53,8% for di e mercado di Venezuela. Si exclui Venezuela ta mira un crecemento di 14,3%. E e mercado aki a sigui mira e impacto di Venezuela. No obstante diversificacion pa cu otro paisnan a resulta entre den un crecemento for di mercadonan manera Argentina y Colombia cual a conoce cifranan di 48,6% y 14,7% di crecemento respectivamente.

Cu excepcion di Venezuela, Chile y Ecuador, tur pais den Latino America a aumenta cu e cantidad di bishitantenan pa nos isla durante 2017.

Europa
For di Europa a ricibi un total di 90.871 bishitante den transcurso di 2017 y compara cu e aña prome, esaki a subi cu 4,8% cual ta 4.128 turistanan Europeo mas pa nos isla. E continente Europeo ta representa 8,5% di e total di turismo pa Aruba. Distancia ta keda hunga un papel importante pa e mercado mas leu di Aruba pero na otro banda por mira cu e turista Europeo ta keda mas anochi na nos isla, segun ATA. Hulanda a trece un total di 37.246 pa nos isla, cu ta un aumento di 2,5% (904 bishitante mas
in total).

Alemania a trece 5.783 turista cu ta un aumento di 1.109 bishitante mas (23,7%) y Reino Uni a trece 773 bishitante mas pa nos isla, un aumento di 4,2% y un total di 19.201 bishitante pa nos isla.

Ganashi hotelnan
Segun estadisticonan suministra door di Aruba Hotel and Tourism Association (AHATA) pa loke ta 2017, e Average Daily Rate (ADR) a aumenta cu 4,6% compara cu 2016. Esaki ta 226,73 dollar na 2016 compara cu 237, 22 dollar na 2017. E rendimento pa camber disponibel, e asina yama RevPAR a aumenta cu 10,8% di 181,09 dollar na 2016 pa 200,60 dollarna 2017. E averahe di anochinan di camber ocupa a aumenta cu 4,7% compara cu 2016 bayendo di 79,9% di ocupacion pa 84,6% den 2017.

E cantidad di anochinan obtenibel pa camber a aumenta cu 1,1%. Pa aña 2018 ATA ta proyecta un crecemento di 0,8% di e RevPar compara cu aña 2017. Turismo crucero a aumenta mas cu 20% “Esaki ta un mercado cu ATA hunto cu Aruba Ports Authority ta satisfecho di por remarca cu ta conociendo un aumento continuo y stabiel”, asina e oficina di turismo ta bisa. En total na 2017, Aruba a ricibi 792.403 pasahero crucero for 352 diferente barco cu ta ekivalente na un aumento di 20,8% den cantidad di pasahero compara cu 2016 y 14,7% of 45 barco adicional.

Pa aña 2018 ta proyecta pa aumenta turismo crucero cu
7%