E proceso di vacunacion contra Covid-19 a cuminsa dia 8 di december ultimo na Inglatera cu e vacuna di Pfizer & BioNTech, y ya caba mas cu 186 miyon dosis di e vacuna a wordo poni den mas cu 86 pais rond mundo.

Bon Dia Aruba a consulta cu Aruba Tourism Authority (ATA) riba e campaña di vacunacion cu ta tumando luga den area strategico di nos mercado turistico y su efectonan pa nos principal industria y fundeshi di nos economia. Si esaki lo wordo traduci pronto den fluho mas grandi di turista, specialmente for di Europa y Merca. Tambe for di Latino America, mirando un Chile agresivo den su campaña di vacunacion.

Vacunacion y turismo

Directora di ATA, Ronella Croes a laga sa cu e proceso di vacunacion sigur ta traha faborablemente pa e mundo di biahe. Di dos manera: Den e escogencia di unda pa biaha! Pues mas hende ta vacuna den e pais cu nan kier bishita, mas confiansa e ta brinda e consumidor. Di otro banda, e consumidor ta sinti’e mas sigur di un biahe unabes cu e mes a vacuna tambe.

Algun pais ta resaltando den nan rapidez di vacunacion y aki berdad Chile ta un di nan. Aruba ta habri pa Chile. Aruba ta conta cu vuelonan di Avianca y COPA y tambe vuelonan di Merca cu por wordo uza pa biaha di Chile, y pues lo enfoca riba atraccion di Chilenonan pa nos isla.

Un otro pais cu ta canando dilanti den vacunacion ta Inglatera y aki ta spera cu operacion di vuelonan charter di TUI UK lo por resumi na dado momento debidamente. Pa loke ta e mercado principal di Merca, casonan positivo a baha y vacunacion ta sigui ta un punto di enfoca cual ta positivo pa nos, segun directora di ATA.

E halto ehecutivo di turismo ta haya cu fuera di para tras di un proceso di vacunacion local mas rapido cu ta posibel, y cu ta captura gran parti di nos comunidad, ATA ta sigui di cerca e proceso y rapidez di vacunacion for di nos mercado nan clave. E proyeccion pa luna di maart ta encera un total di bishitante di 42 mil. Esaki lo ta un adelanto compara cu januari y februari, y mas cerca di locual Aruba a ricibi na luna di december 2020, cual ta e luna cu nos a ricibi mas hopi bishitante aña pasa (42,936).

El a bisa cu despues di a cuminsa e aña cu hopi reto adicional y resultadonan mas abou cu proyecta, ta nota un tendencia proyecta di recuperacion na maart y pa e luna nan cu ta sigui. Claro tur cos por cambia, pero indicacion nan actual di parti di nos tour operadornan, hotelnan y companianan aereo, ta refleha recuperacion gradual den luna nan nos dilanti, incluso temporada di verano. Esaki ta refleha entre otro den un publicacion recien di Aruba Airport Authority (Triple A), unda ta indica e cantidad di asientonan aereo programa pa Aruba te cu juni 2021.

Proyeccion

Encuanto e pregunta cu si e proyeccion duna pa luna di maart di 42 mil bishitante ta estrechamente relaciona cu e proceso di vacunacion cu ta tumando luga specificamente den nos mercado principal, esta Merca. Alrededor di 50 miyon hende a wordo vacuna na Merca y ta wordo spera cu e cifra aki lo subi te 100 miyon pa fin di april.

Ronella Croes a cita nos mesun socionan riba kico ta e factornan cu ta trahando na bentaha di Aruba, cu por cierto den benta y boekings ta canando dilanti competencia (basa riba feedback di varios socio), el a laga sa.

Un factor tin cu haci cu Aruba su mercadeo y promocion internacional ta funciona hopi bon. Otro factor ta relaciona cu Aruba a haci e proceso di e rekisito di test cu e Mericano mester tuma na salida hopi facil. Esaki pues, aunke cu e ta rekeri, no mester stroba nan. Directora di ATA a agrega cu rapidamente Aruba a reacciona y amplia facilidadnan, incluso ofrece e servicio aki na mayoria hotel. E no ta descarta, entre e factornan, mas cu claro cu e vacuna ta brindando confiansa y mas trankilidad den haci un biahe. Esakinan ta algun punto cu ta resalta riba feedback di varios socio.

A pesar cu directora di ATA a trece un perspectiva mas positivo pa nos turismo pa e lunanan venidero, tin estadonan manera Kansas, Missouri y Alabama, caminda e indice di vacunacion ta relativamente mas abao compara cu otro estadonan na Merca. Pero el a indica cu “e areanan for di unda Aruba ta ricibi mas bishitante ta canando bon por lo general pa loke ta vacunacion.”

Paspoort Covid

 

Otro punto cu e matutino aki a trata cu ATA su directora (CEO) tin di haci cu na Europa lo cuminsa implementa e paspoort Covid, pensando riba e temporada turistico di verano. Aruba a firma un acuerdo riba e tipo di paspoort aki. Nos a puntr’e si tin un fecha pa cuminsa pidi e paspoort special aki na Aruba?

El a indica cu berdad den e region Europeo, pero tambe di parti di IATA ta papia di un tipo di health passport. Di parti di Aruba pronto lo lansa un proyecto piloto cu CommonPass y Jetblue cu un tipo di health passport. Croes ta haya cu unabes mas Aruba ta innova hunto cu Jetblue y ta e prome destinacion cu ta lansando esaki cu e compania aereo y CommonPass.

Encuanto si e documento aki lo facilita pa e turista por biaha mas confortabel, por ehempel sin tanto exigencia di PCR y yenamento di informacion den app. Riba e punto aki, el a bisa cu ATA lo adresa na su debido momento e topico di aceptacion di e vacuna como un metodo di entrada pa Aruba cu esnan concerni.

Nan ta ricibiendo masha pregunta di esnan cu kier bishita, cu si nan a vacuna nan por informa di esaki y drenta Aruba. El a bisa cu te cu awor, otro nan den Caribe no a duna indicacionnan clave pa cu nan maneho rondo e tema aki, pero A.T.A. ta preparando su analisisnan necesario pa asina facilita e discusion local pa cu esaki, principalmente cu cluster nan medico y di transporte den seno di CrisisTeam.