Luna di mei a registra cu caida di e volumen total di bishitantenan cu Aruba a ricibi, specialmente for di e mercado Venezolano. Sinembargo, directora di ATA, sra. Ronella Tjin Asjoe-Croes a declara na Bon Dia Aruba cu nan ta bin trahando caba pa atrae mas turista fei di otro mercado potencial pa nos industria turistico y asina trece un balansa.
Mercado di Venezuela
E halto ehecutivo di turismo a declara na e matutino aki, cu nos mester tene na cuenta si cu e mercado di Venezuela ta uno grandi.
“Nos ta papiando di un mercado cu aña pasa a trece 350 mil bishitante”, el a bisa. Mientras cu e mercado di Merca ta trece un 600 mil pa 625 mil bishitante. Y aunke Colombia ta un mercado creciente, directora di ATA ta haya sumamente dificil pa tur e mercado aki hunto, te hasta di Latino America, por compensa e volumen di bishitante cu e mercado di Venezuela ta produci pa turismo di Aruba.
Sra. Tjin Asjoe-Croes a bisa cu e mercado di Colombia ta dunando hopi bon resultado fei di ora cu a elimina e visa. “Colombia bo ta papia di un mercado creciente continuamente desde eliminacion di visa”, el a indica. E ta admiti cu en berdad ora cu nos ta papia di volumen of cantidad di turista ta dos mercado ta brinda nos esey: Venezuela y Merca.
Sra. Tjin Asjoe-Croes a laga sa cu fei di aña pasa caba nan a incrementa nan esfuerso den Merca. E ta e mercado cu ora nos ta papiando di volumen di turista lo por yuda compensa nos turismo mas tanto posibel.
Esfuersonan di ATA
Nan ta haciendo mas esfuerso na Merca, incluso nan ta cuminsando tambe cu esfuerso pa atrae e Venezolanonan cu a emigra pa establece nan mes na Merca, y nan ta concentra den e parti sur di Florida. Nan tin un afinidad pa Aruba, ya cu nan ta conoce e marca. Un factor cu ta contribui pa canalisa e bishitantenan aki ta cu nos tin conexion aereo.
E ta haya cu kisas pa e Venezolanonan cu a emigra pa Florida lo ta agradabel pa ta cerca di cas y Aruba tin un toke special cerca nan. E ta haya cu nos turismo mester capitalisa esey. Pero e esfuerso aki ta bay hunto cu otro esfuersonan cu ATA ta bin realisando entre otro na Mexico. Igualmente saca di otro mercado mas bishitante cu por, pa ehempel Argentina cu ta bayendo bon, Colombia cu tin oportunidad, Europa cu ta un mercado stabiel y ta brinda nos e turista cu ta permanece mas anochi riba nos isla.
Pues directora di ATA a indica cu nan ta realisando varios esfuerso cu nan ta haciendo pa purba compensa e volumen di bishitante cu a laga atras particularmente e bishitantenan Venezolano conoci como “raspa cupo”.
El a bisa cu nos mester realisa cu e mercado di Venezuela ta keda uno “volatil”, pero e ta un mercado cu Aruba no ta bandona, pasobra e ta keda un mercado hopi importante y despues di dificultad y turbulencia, e tempo bon tambe ta sigui. Esaki no solamente ta e caso di Venezuela sino di economia di otro paisnan tambe.
