Keho di diferente instancia tocante no cumplimento di Aruba Tourism Authority ta parce di no ta yuda, den e sentido cu no ta mira nada ta cambia. Conseho Consultivo (Raad van Advies; RvA) ta constata mas tempran den aña, den nan tratamento di presupuesto 2017, cu nan no por conta cu e informacion financiero di e institucion aki. CAFT awor ta haci mencion tambe di te awe no a haya informacion di e institucion di promocion turistico aki. Kico ta pasando? For di declaracion den prensa nos por comprende cu por tin un problema pasobra conseho di supervision di ATA lo no a aproba e cuenta anual ainda. Por ta cu esey tin di haci cu nan ta considera cu e organo aki no ta completo, faltando reemplazo pa e miembronan proponi pa AHATA? Bon mira, esey no por ta e problema, pasobra falta di miembro no ta kita legitimidad di accion di e conseho. Es mas, nan ta keda responsable pa percura cu tur cos, mientras cu ta busca con pa completa e conseho, ta cana lo mas normal posible. Tin hasta hurisprudencia den esaki, entre otro e casonan den corte entre directiva di Comite Olimpico y un mayoria di e federacionnan miembro na 2003.
Y esey ta encera tambe e obligacionnan cu a bin acerca, desde cu ATA, mescos algun otro entidad, a ser declara perteneciente na e ‘sector colectivo’. Banda di gobernacion den sentido estricto, e ministerionan y e colegionan halto di estado, e sector colectivo a keda acorda, entrante 2016 entre gobierno y CAFT. Pa dos aña en todo caso, a keda stipula cu AZV, SVB, Serlimar, Universidad di Aruba, y Aruba Tourism Authority ta pertenece na e sector aki y por lo tanto ta subordina na e stipulacionnan di e ley di CAFT. Esaki ta encera dunamento di cuenta na tempo, no solamente di e aña cu a caba den cuenta anual, sino tambe den e proyeccionnan cu tin di haci cu presupuesto di gobierno. Y ta aki unda cu no tin cumplimento, manera ilustra aki riba. Talvez ATA mester custumbra ainda cu e ministro cu tabata nenga di duna cuenta, manera e keho di RvA ta menciona, no tey mas, pero tin otro ministro na e puesto y mester por spera di su persona cu e si ta exigi di ATA cu mester cumpli cabalmente cu e exigencianan di transparencia cu gobierno di Aruba mes a acorda cu gobierno di Reino aña pasa.
Pero, nos no mester exigi cumplimento pasobra ‘Hulanda ta exigi’. Mester exigi cumplimento pasobra tur entidad liga na gobernacion mester percura pa nan tin nan cosnan na ordo, sino ta imposible pa hiba un maneho responsable. Si bo no por duna CAFT of RvA bo proyeccion y plannan pa e siguiente aña, ta con na prome lugar bo kier hiba un maneho sano pa bo mes? Y una vez bo tin bo plannan bon elabora, ki problema bo por tin pa comparti esakinan cu otro entidad di gobernacion, cu mester di esaki pa nan por haci nan trabao? Ademas, e ta ley y esey ta haci cu hasta cierto entidad, manera CAFT, por exigi cu ta cumpli cu ley y cu nan ta haya acceso na tur administracion, documento y cargador di informacion cu nan por tin mester pa haci nan trabao. Cu nan te awor ta keda ‘netjes’ y ta señala e falta di cumplimento di e entidad cerca gobierno, mescos cu RvA ta haci, ta signo di civilisacion, pero tin otro manera pa obliga e entidad cumpli. Pero e no mester yega asina leu, ta gobierno mester actua y percura pa cumplimento.
Henter e asunto aki ta haci nos corda den pasado cu tabatin ministro cu ta ordena nan departamentonan pa no laga Centrale Accountansdienst (CAD) drenta pa haci nan trabao. Pa hopi aña a tolera e tipo di actitud ey cu ta bay diametralmente contra tur norma y regla di bon gobernacion.
Tur esaki un biaha mas ta subraya e importancia di bon gobernacion den tur entidad gubernamental. Den e caso cu nos a señala aki riba nos mester bisa cu no ta trata solamente di ATA cu no ta cumpli, pero cu e lista cu nan a inclui den nan conseho pa presupuesto ta duna un imagen tristo di varios di e empresanan estatal cu no por o no kier duna nan informacion. Naturalmente esey no ta kita cu tin un man yen di nan cu si ta cumpli cabalmente cu nan obligacion, laga esey tambe ser bisa. Pero di cual ta sinti falta, ta un man fuerte di gobierno mes cu ta impone ordo riba e entidadnan aki. Esey no ta asina straño, pasobra gobierno mes no ta custumbra di haci tur cos na un manera ordena, te pa nan bay exigi di otronan pa nan haci esey.
Sin embargo, di banda di CAFT nos ta tende comentario positivo encuanto mehoracion den e administracion financiero di gobierno. Nos ta contento di tende esey y lo ta mas contento ainda di tende cu e administracion ta perfecto. Pero mester pone ordo riba e ‘yiunan’ tambe.
