Directora di Oficina di Turismo di Aruba (ATA), Ronella Tjin Asjoe-Croes a bisa cu nan tin un bista di cuanto hende a drenta y sali den e ultimo siman. Igualmente nan a pidi cooperacion di departamento di Migracion pa nan por haya un bista actualisa, y asina por sa e cantidad di turista cu no a bandona nos isla, y por monitor esaki.
El a referi na e preguntanan di Bon Dia Aruba relaciona cu tin turistanan cu no kier bandona nos isla, considerando cu den nan pais di origen e situacion di coronavirus (Covid-19) ta uno mucho mas grandi y alarmante cu na Aruba. Igualmente, si tin un deadline pa atende cu e situacion aki?
El a bisa cu ATA ta consciente cu tin algun bishitantenan cu a opta di keda na Aruba. E hotelnan a haci apelacion na nan y nan a logra saca varios di e bishitantenan aki, y ATA a asisti nan pa pone na otro caminda. El a bisa cu e hotel timeshare tin otro maneho, caminda cierto bishitante a dicidi di prolonga nan estadia na Aruba debi na e situacion mundial di Covid-19.
E alto ehecutivo di ATA a bisa cu ainda no a wordo stipula un deadline, pero si nan ta den contacto estrecho durante e proceso aki, entre otro cu aeropuerto di Aruba (Triple A).
El a subraya cu ainda den e dianan aki tin vuelonan cu ta saliendo te cu diaranson for di Aruba, specificamente pa New York y Atlanta. Nan ta e ultimo dos vuelo cu ta saliendo pa Merca por lo pronto. Igualmente pa Hulanda tin vuelo te 28 di maart awor. Pa loke ta e vuelo pa Bogota (Colombia) y Panama cu ta e dos puerto aereo for di Aruba pa Latino America, no tin mas vuelo mas.
Grupo turista Argentino
Esaki ocasiona cu actualmente tin un grupo di mas cu 30 Argentino pega na Aruba, sin cu nan por a bolbe na nan cas, debi cu Copa Airlines a cancela tur su vuelonan.
Directora di ATA a referi na e situacion aki, caminda nan a ofrece e grupo aki acomodacion no paga, tanten por logra un solucion pa nan. Ya caba ATA tin contacto cu departamento di Asunto Exterior, pa asina envolve embahada di Argentina pa bin na e areglo necesario pa yuda e grupo aki, mientras cu ta wordo presenta e siguiente posibilidad di vuelo pa nan por bandona nos isla.
