E aña aki Aruba Tourism Authority a uni forsa un bes mas cu Raad van Kinderen pa asina ricibi conseho for di nos muchanan riba un topico. E biaha aki a toca turno na e alumnonan di Kudawecha Basisschool pa partricipa. Raad van Kinderen, of Kids Counsil ta un iniciativa di Prinses Laurentien y Unicef den cual muchanan di scol ta sera conoci cu diferente negoshi y organisacionnan, cu ta duna nan un pregunta pa nan resolve. Asina aki e muchanan por yuda pensa structuralmente cu organisacionnan riba diferente temanan. No ta prome biaha cu ATA ta haci uzo di e proyecto aki. Aña escolar pasa, alumnonan di Pieter Boer School a traha hunto cu Aruba Tourism Authority pa asina formula solucionnan pa con pa stimula hobennan pa drenta industria turistico y pa ta mas activo tambe den esaki.
Na e muchanan di Kudawecha Basisschool, ATA a presenta e dilema unda ta desea pa introduci e topico di turismo como materia den e curiculo di scol, pero kier a explora cua lo ta e mihor manera pa hasi esaki. E obhetivo cu ATA kier logra ta pa crea un les di turismo cu ta resona cu e muchanan y alabes ta educa y informa e muchanan di e aspectonan importante di nos turismo. ATA ta enfoca ariba e dilema aki pa asina nos muchanan por compronde y conoce mas tocante nos pilar economico. E meta di ATA ta pa por fungi como un fuente di inspiracion pa nos muchanan, pa asina den futuro nan por sigui aporta na nos pilar economico y pa asina sigura cu e motivacion pa labora den e sector turistico tey. Cu e plan aki ATA ta brinda e muchanan e oportunidad pa sugeri topiconan cu mester wordo cubri y pa comparti con segun nan informacion por yega mas efectivamente serca hobennan.
ATA na su turno ta brinda e muchanan un buki educativo referente nos turismo, y lo brinda e alumnonan di Kudawecha Basisschool feedback valioso pa asina sigura cu na final di e trajecto aki tin otro grupo di hoben mihor informa di kiko ta come y bebe den nos industria di turismo.Ta gradisi e docentenan tambe pa nan cooperacion y entusiasmo pa cu e proyecto aki
