Ayera atardi, a tuma luga un conferencia di prensa pa trece dilanti un update di Aruba Health and Hapiness Code, di parti di Departamento di Salud Publico conhuntamente cu Aruba Tourism Authority (ATA).

Yvette Geerman, hefe di departamento Dienst Warenkeuring en Hygiene di DVG, a splica cu Aruba Health and Hapiness Code ta un proyecto den colaboracion cu ATA, cu ta trata di otorgamento di un seyo, unda cu tur localidad cu kier haya e seyo mester haci un pre-registracion cu e cual nan ta haya un seyo di colo y despues otro colo oro. Ora DVG ta haci un inspeccion na e localidad, ta hopi importante pa nan cumpli cu e medidanan di higiena pa e siguridad di e bishitantenan cu ta bin Aruba y residentenan local.

Geerman a expresa cu na momento cu DVG bay haci inspeccion di e localidad cu a haci e peticion di e seyo, pa wak si nan ta cumpli cu diferente puntonan di inspeccion, nan ta revisa por ehemplo si nan ta cumpli cu e normal nobo di distanciamento social, reglamento di higiena como labamento di man, uso di hand sanitizer y evita aglomeracion di hende.

Apart di tur e punto aki cu ta conforma e normal nobo, Geerman a specifica cu nan ta pone atencion riba e siguridad di cuminda, awa y si e localidad ta cumpli cu exigencianan prome cu el a bin na remarca. Igualmente cu reglanan di higiena cu personal, World Health Organization y leynan existente, pa asina nan haya un aviso positivo y DVG ta duna nan feedback pa ATA.

Geerman a bisa cu tambe ta importante pa tur localidad pone atencion riba nan agenda (logbook) un maneho cu ta forma parti di e normal nobo, pa motibo cu eynan nan ta compila tur e data y a base di esey por identifica cosnan cu por bay robes.

Di mesun manera, el a informa cu e localidadnan cu a aplica pa seyo di oro a haya inspeccion den ultimo 5 simannan. Di e 223 localidad cu a aplica, 109 mester haci un ‘hard control’. Tocante esaki Geerman a bisa cu esunnan cu ta hayando bishita ta hotelnan, F&B, retail, supermercado y casino.

Pa loke ta trata casino, Geerman a comenta cu un 50% di nan ta cumpliendo cu tur rekisito manera ta describi. Di F&B nan a bishita 42 localidad y 19% ta cumpli; di 123 retails 84 ta bin na remarca pa seyo di oro,; di 33 supermercado cu a haci inspeccion 3 di nan ta cumpli cu e rekisito. Tambe el a bisa cu nan a bishita 6 casino y 4 di nan ta bin na remarca.

Di su parti, Ronella Tjin Asjoe-Croes, CEO di ATA a splica cu e programa aki ta continuando den fase number dos y kico e resultadonan ta te aworaki. Ademas cu e lo continua den simannan y lunanan cu ta bin pa asina haci e control debido.

Tjin Asjoe-Croes a expresa cu ta hopi importante pa localidadnan por prepara nan mes como negoshi. Pero tin diferente sector unda cu hopi di nan a wordo bishita, pero no ta cla pa ricibi nan seyo di oro.

Di e 2,371 compania cu ta pre-registra, algun di nan a wordo bishita, otronan a ricibi e bishita of un alerta. Por tin excepcionnan, por ehempel si companianan cu mester pasa inspeccion cu ta na aeropuerto tin diferente rekisitonan of companianan cu ta cera cu mester wordo alerta adelanta pa por haci algun acuerdo. Pero por lo general e inspeccion ta implica un bishita di sorpresa durante cual ta verifica cu tur cos cu a reporta ta na ordo.

Tocante e medidanan cu ta wordo tuma si e establecimento no ta cumpli cu e rekisitonan, Tjin Asjoe-Croes a comenta cu no solamente e negoshi no ta haya e seyo, aunke tin posibilidad pa remedia cierto puntonan. El a expresa cu esaki ta un topico hopi actual den comunidad y pa bishitantenan, cu di parti di ATA el a señala cu esaki ta un programa cu ta enfoca riba e medidanan di higiena eleva.

Manteniendo den esey y conhuntamente cu DWH y DVG, nan a bin cu diferente aspectonan cu entrante ayera si un compania a haya un ‘warning’ cu no ta cumpli cu e rekisitonan, e ta haya su chens pa remedia cierto cosnan. Pa di dos biaha si no ta remedia esey,,, nan lo kita e seyo di colo.

E negoshi cu ta perde su seyo di colo e ora ey e mester re-aplica y cuminsa cu e proceso, cu ta exigi un pre-checkeo online. Pero aworaki e enfoke ta riba esunnan cu lo haya nan seyo di oro, pa loke ta nifica cu esunnan cu a perde nan seyo di colo mester tene na cuenta cu e proceso lo dura algun luna, loke ta duna un desbentaha pa e compania.