Durante un conferencia di prensa di ayera anochi, CEO di ATA Ronella Tjin Asjoe-Croes a splica e situacion di Arubianonan cu a keda pega den exterior debi na cancelacion di vuelonan pa via di e pandemia COVID-19.

El a informa cu den exterior tin 217 persona Arubiano, principalmente na Colombia. Tambe el a comenta cu ayera atardi un grupo a bin for di Merca y otronan, cu a cuminsa haci areglo pa por regresa for di Hulanda y otro diferente destinacion.

Di loke ta trata esunnan cu ta na Colombia, Tjin Asjoe a anuncia cu nan tin den planificacion registra tres vuelo charter. Asina mes el a menciona cu awe ta e ultimo dia cu nan tin pa move segun nan capacidad pa por yega na e tres ciudad for di unda lo ta sacando e vuelonan aki.

E tres ciudad Bogota, Medellin y Barranquilla; pa dia 25 di maart 11or di mainta lo sali un vuelo for di Medellin, e mesun dia lo sali un otro vuelo pa 4.15 di atardi for di Barranquilla y diahuebs 26 di maart 11.15 di mainta lo sali e vuelo for di Bogota.

El a bisa cu ta importante cu mester ta consciente cu tin diferente persona na otro ciudad di Colombia por ehempel, Cali, Pereira, Santa Martha, Bucaramanga, Catagena, Popayan y cu nan mester percura yega na e ciudad unda lo tin e vuelonan pa por bin bek Aruba.

Tocante e rekisitonan cu nan mester presenta ta e nomber, fam, paspoort y number di cedula. Asina mes el a señala cu e linea a cera ayera anochi, pa asina nan por enfoca riba esunnan cu ta na Colombia y cu mester di asistencia urgente. Proximamente nan lo comunica cu e personanan cu nan tin riba e lista.

Esaki tambe tin cooperacion di embahada na Bogota, cu ademas di duna informacion lo duna esey pa aerolinea y embahada, cu ta trahando diferente carta pa haci posibel y nan no lo haya dificultad a momento di mobilisa internamente na Colombia.

Si e personanan no ta den e tres ciudad principal for di unda e vuelonan lo sali, lo haya un carta cu su nomber pa asina hustifica e mobilisacion den e pais.

Si tin cambio den e vuelonan, Tjin Asjoe a comenta cu por ta un cambio den fecha y nan lo tin tur hende informa debidamente.