Despues di e salida repentino di e tres miembronan proponi pa AHATA for di e hunta di supervision di Aruba Tourism Authority (ATA), e pregunta intrigante a bira cuanto tempo e situacion aki por bay dura y kico ta e daño cu e situacion aki por trece cun’e. E berdad ta cu e cuadro legal cu a crea pa e organismo aki, constitui traves di ley den forma di un persona huridico ‘sui generis’, no ta contempla provision pa e situacion cu a surgi cu salida di e miembronan menciona. Mientras tanto di parti di e ministro concerni a haci e peticion na AHATA pa propone seis persona como candidato for di cual gobierno por scoge tres persona y aproba nan nombramento. Ta parce logico cu tanten e conflicto tocante e proyecto di ley riba acomodacion all-inclusive no termina, cu AHATA lo no ascende den esaki y e puestonan den e hunta lo keda habri. Kico esaki ta significa pa e organismo? Kico por haci den un situacion manera a surgi awor?
En general por bisa cu den un caso di directiva incompleto di un persona huridico, unda pa discordia un parti di un directiva tuma retiro, ta keda responsabilidad di esnan cu ainda ta parti di e organismo en cuestion, pa nan actua den miho interes di esaki. Esey ta significa atende e asuntonan cu ta di interes di e organismo, inclusivo percura pa e directiva via e proceso stipula den su statutonan, yega na un composicion adecua atrobe. E hecho cu e directiva no ta completo lo no significa automaticamente cu no por tuma decision. Ademas mester constata cu den e caso di ATA no ta e hunta di supervision, o su presidente, ta representa e persona huridico dentro y fuera di ley. E tarea aki ta na encargo di e director. Anto esey significa cu tur asunto legal cu e organismo mester atende, tin representacion sin problema.
Importante ta pa tuma nota tambe kico e ley mes ta bisa tocante e hunta di supervision. Articulo 12 inciso 1 ta stipula cu e organismo aki tin un minimo di cinco y un maximo di shete miembro. Den e situacion actual e hunta ta consisti di 4 miembro, cu cual no ta cumpli completamente cu e stipulacion di ley. Por imagina un situacion unda pa motibo di no haya recomendacion di otro persona(nan), e ministro ta pasa na nombra por lo menos un persona, sin recomendacion di AHATA. Cu esaki e ora ta cumpliendo cu reglanan di organisacion y e hunta di supervision por funciona sin ningun obstaculo. For di publicidad nos por comprende cu e miembronan cu tabata recomenda pa AHATA a tuma retiro individualmente, sin notificacion di parti di AHATA. Esey lo a habri caminda tambe pa e ministro encarga simplemente invita AHATA pa haci recomendacion di otro persona pa e tres puestonan cu a bira vacante. Por ta cu tin persona cu ta haya esaki poco elegante, pero legalmente e peticion aki pa recomendacion nobo ta completamente segun ley. Den caso cu en berdad yega asina leu cu ministro nombra miembro sin recomendacion di AHATA, esaki ta den un posicion dificil pa reclama un decision asina, ya cu ta nan mes ta e (unico) actor cu por remedia e situacion dunando e nombernan rekeri di e personanan cu nan lo ta desea di recomenda.
Nos por conclui cu e decision di sali for di e hunta di supervision di banda di AHATA por ser mira como un gesto hopi fuerte di desacuerdo cu e maneho di e ministro. Si ta trata di pone presion traves di para of stroba e funcionamento interno di e organisacion, esey no ta duna mucho perspectiva, ya cu en principio e nombramento mester bay riba recomendacion di AHATA, pero si nan no ta coopera den esaki, e hunta di supervision, y e ministro encarga, tin di actua segun miho interes di e organismo, y esey ta cu tin un hunta di supervision cu ta cumpli cu e reglanan interno pa cu esaki. Si acaso e asunto aki mester yega dilanti mesa berde (no di e partido…), e ministro, alegando su deber pa garantisa funcionamento adecua di e organismo, lo tin un caso basta fuerte.
E manera pa AHATA salvaguardia e influencia cu e tin ta di duna e nombernan concerni pa e ministro haci su escogencia. Aunke e gesto di retira for di ATA ta duna di conoce con disgusta AHATA ta cu e actual situacion unda aprobacion di e ley di all-inclusive ta inminente, e repercusionnan pa funcionamento di e organisacion mes ta minimo. Naturalmente e daño grandi ta keda na nivel di relacion entre sector publico y priva, y entre persona den e sector na un momento cu Aruba mester di consenso den su sector economico principal, cu tin mas menasa cu solamente all-inclusive. No ta conoci ainda con e ministro ta desea di forsa e ley pasa den parlamento, esey e por logra, pero con pa drecha e relacionnan den e sector despues. No ta cuestion di yega, brasa, sunchi, anto tur cos ta regla…
