Oficina di Turismo di Aruba (ATA) ta premira cu pa 2020 lo tin crecemento den turismo, pero mas modera. Tin diferente mercado cu ta continua di ta importante pa nos producto turistico, pues nan no ta mira e necesidad di habri mas mercado nobo.
Pero si ATA ta sigui concentra riba e mercadonan cu nos tin pa nos producto turistico caba. Nan ta haciendo esfuersonan specialmente pa bin cu vuelo directo non-stop for di cierto mercadonan prometedor. Nan ta Peru, Inglatera y Italia.
Directora di ATA, Ronella Tjin Asjoe-Croes a subraya cu den Merca, nan lo sigui cu e strategia di diversifica mercado den e pais aki, cu ta nos principal mercado turistico. Aruba su industria turistico tin tres area cardinal na Merca cu ta New York, Boston y Philadelphia. Tambe e marca Aruba tin otro mercadonan cu ATA lo sigui stimula pa loke ta trata crecemento.
El a menciona cu na fin di aña 2018 a wordo introduci un vuelo non-stop di Dallas cu American Airlines. Ainda e t’ey y e ta bayendo bon y e vuelo aki ta parti di Aruba su portfolio turistico. Tambe na inicio di 2018 a introduci e vuelo di Jet Blue for di Fort Lauderdale. E ta haya cu e vuelo aki ta yuda ATA su strategia pa bin cu pasonan clave pa nos sigui cu e diversificacion na Merca.
Latino America y Europa.
Pa loke ta e region di Latino America y Europa a registra un crecemento cu nos a logra den e decada tras di lomba caba, excluyendo Venezuela di e region di Sur America. ATA a enfoca hopi riba otro mercadonan na Latino America, unabes cu Venezuela -cu tabata dos di dos mercado- a bira un reto grandi pa nos sector turistico. Directora di ATA a bisa cu e strategia ta pa pusha tur otro mercado.
Intencion di ATA ta di sigui pusha e dos region aki. Nan sa cu un di e retonan mas grandi na Latino America ta cu e region ta hopi volatil. Por ehempel, Argentina tabata un mercado hopi fuerte debi cu su economia tabata mas faborabel… aworaki nan ta confronta otro situacion. E meta di ATA pa Argentina ta cu nan por mantene loke a logra aña pasa, kiermen no a pone crecemento acerca pa 2020, y asina ta sucede cu otro mercadonan.
Vuelonan directo.
Den e region aki ATA ta sigui promove nos turismo na Colombia, Chile y Brasil. Sinembargo directora di ATA ta mira interesante e mercado di Peru. Pa e mercado aki algun aña pasa a elimina e visa. Esaki ta contribui pa Aruba por sigui cu hopi esfuerso pa por logra introduci un vuelo non-stop. E ta un strategia clave cu ATA ta sigui riba dje y e ta spera cu pronto lo por anuncia un vuelo directo entre Aruba y Peru.
“Esey no solamente ta beneficia e mercado di Peru cu ta bin creciendo,” el a bisa. Pero e posibilidad di un vuelo asina por habri mercado pa combinacionnan pa esunnan cu ta bin di Europa, y cu ta bini Lima-Aruba. Den pasado nos tabatin e ruta aki cu KLM y el a duna su resultado faborabel.
Na Europa no tin mercado nobo. Aruba ta keda cu su mercado existente, entre nan Alemania, Italia, Belgica, Hulanda, Inglatera y Scandinavia. Sinembargo un punto cu e kier destaca ta, cu Aruba ta haciendo esfuerso pa por logra concretisa proyectonan cu ta andando.
Tjin Asjoe-Croes ta spera cu pronto ATA lo por bin cu un bon noticia di anuncia vuelo adicional for di Inglatera. “E ta algo cu nos ta bin trahando pa hopi tempo riba dje,” el a bisa na Bon Dia Aruba.
Otro deseo cu ATA lo kier concretisa, y nan ta bin trahado riba dje pa anuncia ohala pronto, ta vuelo non-stop for di Italia. Pa e dos mercado Europeo aki, ATA ta masha speransa cu pronto nan lo ta logrando vuelonan nobo treciendo crecemento for di nan.
Competencia fuerte.
A pesar di e panorama aki, directora di ATA ta subraya cu nos mester keda tira bista riba competencia fuerte. No mester lubida por ehempel cu te cu november ultimo, nos region Caribe a registra un bahada di ocupacion consistente luna tras di luna. Sinembargo e situacion ey nos no a mira na Aruba. El a trece e anotacion aki pa djis pone den contexto e desaroyo di turismo den nos region.
Igualmente otro destinacion a confronta diferente dificultad, entre nan Republica Dominicana cu a mustra caida den turismo. Pero Mexico tambe ta otro destinacion grandi cu tambe ta mustrando caida den turismo. Pero tur esaki ta mara -segun directora di ATA- cu bo mester mantene bo producto solido. Republica Dominicana a confronta caida den su turismo pa diferente motibo relaciona cu alcohol, problema di siguridad, etc… Mexico a confronta problema tambe entre otro cu sargasso of yerba di lama.
“Nos no mester lubida cu no ta necesariamente locual nos ta experiencia, otro ta experenciando. Nos obstante cu tin situacion faborabel economicamente,” el a bisa. Un situacion faborabel ta e mercado Merca, caminda si bo pusha, por ta bo ta haya mas, danki na e factor economico.
Aña pasa tempo cu a midi e satisfaccion di nos bishitantenan, caminda te cu augustus, ATA a colecta 6 mil encuesta na aeropuerto. Un 88% a bisa cu nan ta satisfecho di nan estadia na Aruba. “E ta hopi positivo!”, el a bisa.
Ademas un gran mayoria ta bisa cu nan lo recomenda pa bin bishita Aruba. Encuanto si nan lo bolbe, e encuesta a mustra entre 60% pa 70%, a bisa cu si. Pues e ta un tiki menos cu esun di satisfaccion. Directora di ATA ta interpreta cu esaki talbes tin di haci cu Aruba ta un destino mas eleva den prijs, kiermen bo no por bin cada rato.
Un punto cu mester atencion ta e balor pa placa, kiermen e sentimento cu bo ta paga y talbes bo tin expectativa di por haya un tiki mas pa e prijs eleva cu bo ta paga na Aruba.
Nos puntonan cu a score mas halto ta nos beach, siguridad y amabilidad. Nan ta aspecto cu nos mester mantene, pero por lo general e grado di satisfaccion di nos bishitantenan, ta sumamente importante. Esey nos mester keda mantene y esey ta den nos man, asina directora di ATA a conclui.
