Durante weekend, minister di Cultura, Xiomara Maduro a anuncia cu ta bay tin un parada di carnaval cu tema di bandera nacional dia 26 di februari proximo. Pa e parada aki, a pone un subsidio di 100mil florin, y durante cu a haci e anuncio, a indica cu ATA lo cubri e gasto for di fondonan cu tabata presupuesta caba pa actividadnan di carnaval. Sinembargo, ayera ATA a aclaria cu nan no lo cubri henter e suma.
Asina CEO di Aruba Tourism Authority, Ronella Croes a informa na noticiero online NoticiaCla. Croes a bisa cu ATA no ta bay cubri henter e suma, sino solamente un parti, pero e parti aki no a keda determina ainda. Pues no sa precisamente cuanto placa lo ta cubri pa ATA, y cuanto placa lo ta cubri pa otro instancianan.
Minister di Cultura, Xiomara Maduro a bisa NoticiaCla tambe cu ‘otro departamentonan di gobierno’ tambe ta bay contribui placa pa yega na e 100mil florin di subsidio pa e parada nacional, pero no a specifica cua departamento ni cuanto placa cada uno lo aporta.
Mirando cu gobierno ainda no a pasa presupuesto 2022, ta den negociacion cu sindicatonan relaciona cu reduccion di salario di ambtenaar, y ainda ta buscando sosten di likides di Hulanda, Bon Dia Aruba a tuma contacto cu e mandatario pa puntra di unda precies lo saca fondo pa financia un actividad di carnaval. Bon Dia Aruba a puntra specificamente ki departamentonan ta bay contribui na e subsidio, y for di ki fondo cada departamento ta bay saca e placa en cuestion, pa financia e celebracion.
Maduro a bisa Bon Dia Aruba cu e ‘no a bisa cu ATA no ta contribui cu 100mil’, pero si a indica cu otro departamentonan ta bay contribui. “Departamentonan cu ta contribui semper na Carnaval ta Polis, DOW, IMSAN, Brandweer y Serlimar”, Maduro a bisa. “Ta bay di nan presupuesto manera el a bay semper. No tin nada straño of otro lo tuma lugar.”
