Segun vice prome minister/minister di Infrastructura Otmar Oduber (POR), Aruba Tourism Authority(ATA) no a haci ningun compra di ekipo pa ministerio di Turismo of gobierno anterior.
Ayera durante rueda di prensa semanal di gobierno el a señala varios documento riba propiedadnan di gobierno cu ta yegando bek Bestuurskantoor y otro cosnan cu ainda haci falta manera 27 celular iPhones cu no a wordo entrega bek na gobierno.
A mira hopi discusion ultimo simannan relaciona cu ekiponan y pertenencianan di gobierno pa cual continuamente informacion eroneo ta wordo treci dilanti segun minister Oduber.
“Mi a tuma nota di cierto medionan di comunicacion specifico cu ta dedica na trece e noticianan aki pa dilanti cual no ta cuadra cu realidad. Esaki ta bira pio ora cu mira miembronan di oposicion den parlamento di partido AVP ta sostene e informacionnan aki cu no ta basa riba e berdad.” Akinan e ta referi na comentarionan cu miembro di parlamento sr. Candelaria (AVP)a papia cu ATA entre otro lo a cumpra propiedadnan pa e ministerio di Turismo anterior y cu esakinan nunca a wordo laga atras. Sr. Oduber ta comenta: “Pa cual mi tin cu garantisa comunidad di Aruba, cu ATA no a haci compra di ningun ekipo pa e ministerio anterior y tampoco pa gobierno anterior. E insinuacionnan aki ta totalmente falso y pues ta spera cu sr. Candelaria por coregi esaki pa motibo cu ta daña nomber di un instituto serio, esta ATA.”
‘Propiedad di gobierno mester keda na gobierno’
Minister Oduber a bisa cu den e sala di computer na Bestuurskantoor tin mas o menos 50 pa 70 computer cu ta pre historico cual a wordo cumpra y uza 4 pa 5 aña pasa. Tabata tin hopi computernan marca iMac y solamente tres a wordo ricibi bek te ainda den Bestuurskantoor.
E proceso di e discusion cu ta andando na momentonan aki, si mira den e ultimo dianan aki tin hopi cos no ta klop segun e mandatario. “Ta importante pa comparti cu comunidad cu aki no ta trata di ningun persecucion politico, si no simplemente cu propiedad di gobierno mester keda na gobierno.”
E mandatario a reacciona riba comentarionan cu e lo mester a bay cu algun ekipo tempo cu el a baha como minister di Turismo aña pasa. El a desmenti esaki bisando cu: “E tempo ey tur cos a wordo entrega na gobierno.” E mandatario a bin cu algun copia di e-mailnan y cartanan ayera na e rueda di prensa unda ta mustra cu esakinan ta drentando tur dia awor di ex mandatarionan y empleadonan di gobierno cu ta treciendo cosnan bek y ofreciendo hasta pa cumpra e articulonan manera computernan marca Mac.
Otro apelacion pa trece cosnan bek
Durante ultimo dos simannan tin un coordinador di ex minister Mike de Meza cu a bin cuater biaha Bestuurskantoor caba pa entrega materialnan di gobierno. “Esaki no ta persecucion, e ta sinberguenseria. Ora bo gara propiedad cu no ta di bo y bo ta bay cu nan.” E siman aki a resulta segun minister Oduber, cu ora nan a bay check riba mas ekipo y material di gobierno, a resulta cu tin 27 celular iPhone cu a wordo busca den e ultimo cinco luna di e aña aki.
Minister Oduber: “Niun a bin bek Bestuurskantoor. Mas cu 30 mil florin djis na telefon cu a wordo busca y no a bin bek ainda.” E ta comenta tambe riba e informacion riba Tera Group cu a ricibi 7.8 miyon florin for di pueblo di Aruba den ocho aña di tempo pa haci propaganda pa gobierno.
“Anto esaki ta un punto pa mi pasobra mescos aña ta cera, nos ta cera e capitulo di abusadonan cu tabata tin den e gobierno anterior. Caminda cu nos ta pidi atrobe a pesar cu tin un caso andando nos ta bisa esunnan cu ainda tin pertenencia di gobierno, pa por fabor trece esakinan. Abo no a paga pa nan, pueblo a paga pa nan.”
