ATA : ‘Mester crea y promove un experiencia unico y autentico pa expande nos turismo na Aruba’

Diaranson mainta, Aruba Tourism Authority (ATA)  hunto cu MasterCard a tene e aña aki un otro charla hopi interesante titula ”Priceless Talks” na Alhambra Ballroom caminda a trece pa dilanti alternativanan nobo pa yuda negoshinan y turismo na Aruba crece y desaroya un sosten mas fuerte.

”Definitivamente, turismo ta trata di hende y hospitalidad y nos mester percura cu e sector di labor y esnan cu ta compañero di nos tin e habilidad necesario, calidad di servicio y sabiduria apropia pa esaki por bira e motibonan pakico hende ta keda regresa nos isla”, CEO di ATA, sra. Ronella Tijn Asjoe – Croes ta bisa.

Despues di a duna un caluroso bon bini na tur e representantenan internacional di Mastercard y doñonan di diferente negoshi local y internacional, sra. Croes a sigui splica con importante e ta pa Aruba organisa eventonan manera esaki cu sigur ta bay cuminsa atrae hopi mas oportunidad pa e isla cu no ta solamente economico pero tambe oportunidadnan pa crece den diferente departamento. Esaki tabata un charla cu a concentra riba tecnicanan nobo di social marketing,  oportunidadnan comercial , Data Analitico y con tur esaki ta aplica pa bo beneficio manera doño di negoshi y trahado den sector di turismo, mientras tambe enfatisando riba e importancia di eleva servicio di cliente door di miho instruccion y un toke personal.

Un di e conceptonan di mas importante cu a pone enfasis riba dje ta pa en general sigui continuamente expande e experiencia di bishitantenan riba nos isla segun declaracion di sra. Croes. ”Un cos pa tuma na cuenta ta e hecho cu e factor di determinacion pa locual ta e proceso di kies un destinacion, ta e experiencia y recomendacion di otro persona cu ta biaha.”

Awendia, rednan social y internet ta  wordo uza pa casi tur cos locual ta haci hopi facil pa comparti storianan, perspectivanan y ideanan. Pa e motibo aki ta hopi esencial pa traha cu medionan digital y tecnologico sra. Croes ta sigui splica. E strategia di ATA a transforma enormemente durante e ultimo añanan aki cu Digital & Social Media Marketing formando e componente principal den ATA su campaña y esfuersonan di Marketing.  Esnan cu tabata presente na e charla tabata Frits Israel di Management & Costumer Service Delivery (ACP), Marco Botero, gerente di Sales na Twitter (Pan Regional, Miami), John Muñoz, Vice Presidente di Information Services & Partnerships na Mastercard y Daniel De Michele, Vice Presidente di Commercial Development, Mastercard.