Director di Oficina di Turismo Aruba (ATA), Ronella Tjin-Asjoe-Croes a declara na Bon Dia Aruba cu nan tin un bista ‘hopi positivo’ riba e ultimo kwartaal di turistanan cu a bin bishita nos isla.
Sinembargo nan por mira cu e baha di cantidad, no ta refleha necesariamente den e calidad. Esaki nan por a wak den e indicadonan di e hotelnan pa medio di e organisacion cu ta reprsenta nan, esta Ahata. Pero tambe un Banco Central cu ta registra e entrada pa medio di turismo. E ta mustra cu aña pasa no obstante cu ATA a kere cu lo cera aña cu un bahada di 3% – tanto Ahata como Banco Central den nan proyeccion di aña pasa- e bahada a keda riba 1%
Igualmente e halto ehecutivo di turismo a bisa cu otro indicadonan cu ta midi e grado di ocupacion den hotel; pero tambe e cifra cu ta wordo paga pa camber den hotel ta ‘sumamente positivo’.
Comportacion mercadonan
Segun sra.Tjin-Asjoe-Croes nan por mira e comportacion di diferente mercado di nos producto turistico hopi positivo. Sinembargo pa loke ta trata e cantidad di volumen nos por mira un caida debi na e impacto di e turistanan di Venezuela. Pero e ta haya cu si nos ta pone e impacto aki un banda, nos por mira un turismo ta creciente.
E ta haya cu hasta e aña aki nan ta saliendo for di e bahada aki. Ya cu den e prome kwartaal di e aña aki – cu ATA a premira cu lo ta ‘mas pisa’- mirando cu e caida pisa a cuminsa na april 2016, pero e no a sosode asina.
E caida ta birando menos pero e director di ATA no kier canta macamba considerando cu e mercado di Venezuela, ta uno cu a contribui hopi pa nos turismo, pero cu a cay hopi, y cu ATA lo sigui monitor. Siman pasa nan a discuti internamente riba un plan di comunicacion di ATA pa evalua kico nan por haci y kico no.
Nan ta evaluando tambe diferente scenario cu ATA mester reevalua atrobe pa wak cual ta nan posicion conforme evolucion of cambio di cada escenario di nos mercado turistico. “Y esey ta e mercado di Venezuela desafortunadamente awendia.”
