ATA ta optimista cu e lunanan cu ta sigui despues di maart – cu ta april, mei y juni y algun di lunanan di zomer, pa haya un mehoracion pa turismo.

Asina Ronella Tjin Asjoe-Croes, CEO di ATA, a afirma, na unda el a pone esaki a base di con Aruba su turismo ta moviendo. Segun el a menciona, ta un señal positivo y tur hende mester ta consciente di dje. Aunke ta un cifra positivo, el a afirma cu nan lo keda sigui papia di recuperacion y porcentahenan hopi abao di lo cual ta conoci den un aña normal.

Aunke e ta papia di adelanto y recuperacion mas substancial cu e recuperacion no lo bay yega cu e cifranan cu a wordo mira den ultimo aña cu ta 2019.

Di loke ta e parti di ATA, Tjin Asjoe-Croes a bisa cu lo cual nan ta espera pa e aña aki ora 2021 lo cera ta un recuperacion di entre 45% y 60% di lo cual a wordo mira den añanan normal. Esaki ta un tendencia faborabel cu el a sigura cu ta pa diferente motibo di kico ta pushando e benta y demanda pa Aruba ta cu mercado y strategia di comunicacion ta trahando na fabor di Aruba y esey nan ta haya frecuentemente como feedback di parti di e socionan pa asina stimula e demanda.

Aruba ta sigui wordo mira como un destinacion sigur den memey di tur e crisis di pandemia Covid-19 na rond di mundo y situacionnan di gobiernonan di na unda e bishitantenan ta bin cu por ta mustrando mas casonan positivo of un reduccion pero ta sigur cu Covid-19 ta sigui presente.

E hecho cu Aruba a pone mas facil pa bishitantenan por haci e test di Covid-19 di un manera mas lihe, esey no ta nifica un obstaculo pa e bishitante por biaha, no mester lubida e efecto di e vacuna cu ta brinda confiansa y hopi atencion ta wordo poni aworaki riba esaki segun Tjin Asjoe-Croes a señala.

Finalisando, el a bisa cu tin otro aspectonan pa remarca como por ehemplo cu ta traha na fabor di e mercado di Aruba y Caribe ta e hecho cu entre otro for di mercado Americano no ta spera cu hopi lo bay conduci un biahe na Europa pa e lunanan cu ta sigui, pa motibo cu ta mara na e situacion cu tin eynan y tambe tin un trayecto cu ta mas largo di recuperacion eynan mes y ta opta pa bay un caminda unda cu ta mas confortabel, mas conoci cune y ta mas cerca di cas.

“Aruba ta keda na e top 3 of 4 di e destinacionnan mas preferi na e momentonan aki”, Tjin Asjoe-Croes a expresa.

Ademas, el a bisa cu nan ta sigui e tendencia di vacunacion na e mercadonan clave pa motibo cu nan tambe tin interes pa sa con Merca ta move, con rapido Hulanda ta move of otro regionnan na unda kier atrae bishitantenan cu nan tambe ta sigui Aruba y nan tambe ta sigui e tendencia di e resto di destinacion cu por ta un opcion pa nan biahe. “Tin atencion tambe pa cu e vacunacion aki na Aruba”, el a menciona.

Asina mes, ATA lo ta comunicando mas di nan strategia y plan di vacunacion na Aruba na nivel internacional y manera a keda conoci e siman aki ta cuminsa yega e prome lote di vacuna.

“Esaki ta un momento importante cu nos lo pone den luz internacional pa asina sigui brinda e confiansa na e consumidor y nos socionan” Tjin Asjoe-Croes a afirma.

Ademas, el a declara cu “mientras mas hende ta vacuna na Aruba, mas e ta stimula e recuperacion di nos turismo y nos economia y tambe e ta yuda nos pa regresa na nos bida normal”.

“Pa nos mantene esey of kisas stimul’e mas e ta mara na mes na e cantidad di hende cu ta vacuna akinan na Aruba” , lo cual e mes a sigura cu esaki ta un mensahe cu mester pone den contexto economico tambe cu e ta un punto cu nos ta usa pa brinda e confiansa internacionalmente y cu comunidad lo mester pensa riba dje for di e contexto ey tambe.