Den cuadro di reunionnan cu formado sra. Evelyn Wever Croes, Aruba Tourism Authority (ATA) tambe a haya oportunidad pa presenta nan vision pa loke un gobierno nobo mester enfoca riba dje den e proximo 4 añanan. ATA ta mira cu e producto turistico y e prioridadnan cu ta bin cune mester cambia pa via cu e turista ta buscando otro experiencianan, particularmente ora ta trata di sostenibilidad.
Ronella Tijn Asjoe-Croes, CEO di ATA a subraya cu ATA su strategia pa loke ta trata e producto turistico di Aruba ta cambiando. Den liña grandi, Croes ta indica cu e turista awendia ta busca mas pa un conexion cu naturalesa, algo mas autentico y generalmente mas un experiencia di ‘wellness’. Pa e rason aki ATA a yega na un colaboracion por ehempel cu Parke Nacional Aruba.
“Trahando hunto cu Parke Nacional por brinda experiencianan diferente na bishitante, haciendo uzo di y presentando nos recursonan natural den un bachi cu ta atractivo pa nan. Pero tambe cu regla pa asina proteha e recursonan natural. Pero diversificando loke nos ta ofrece. Esaki ta un ehempel di loke nos ta mira ta fit den cuadro di loke un bishitante cu a experiencia un pandemia ta busando awo”, Croes a bisa.
Si ATA ta refleha riba con dependiente Aruba tabata riba turismo, y con esey mester mustra e caminda den con turismo lo mester ta den futuro na Aruba, Croes a indica cu practicamente ta bayendo na un situacion mescos cu prome cu e pandemia a dal.
Loke ATA ta mira pa futuro ta pa por haci e experiencia di e bishitante mas integra. Asina ATA a bin cu e concepto di Aruba HappyFlow 2.0, unda por medio di reconocemento facial, un turista por wordo reconoci ora di huur un auto, of di check in den su hotel. “Asina por ehempel nos por sigura cu e bishitante por ta riba beach den 30 minuut. Esaki ta un ehempel di inovacion cu nos ta treciendo dilanti.”
ATA kier turismo duradero: cuminsa cu estudio di capacidad di carga
Na mes momento e CEO di ATA a trece dilanti cu mirando e ehecucion di e Landspakket, ATA como organisacion ta contento cu ya un gran cantidad di punto di e master plan ta inclui den dje. Den esey ta inclui ehecucion di un gobierno cu menos red tape, cual den su mes lo bay elimina e barera pa por haci negoshi. Ya caba ATA tabata participe na varios procesonan unda tabata papia cu mester elimina red tape, pero esakinan practicamente no a conduci na solucionnan concreto. Pero na e momentonan aki ATA ta confia cu e biaha aki si lo bay pusha cierto reformanan, hustamente pa via di e Landspakket, cual ta pone un presion mas halto pa cumpli.
Banda di esaki, ATA ta pidi pa den cuadro di tur e plannan pa haci turismo duradero pa ‘cuminsa cu e plan di accionnan cu e estudio di capacidad di carga tin pa 8 sitio mas bishita na Aruba. Cu esey nos lo a logra hopi’. ATA tin plannan con pa bay maneha e fluho di bishitante na por ehempel beachnan, lighthouse, bushiribana, etc. mucho mas miho. “Asina dunando e bishitante un miho experiencia pero na mes momento protegiendo loke ta di nos.”
ATA tambe ta mira cu no tin suficiente hende pa traha pa carga capacidad turistico
Croes a trece dilanti cu nan como ATA tambe ta wak cu e preocupacionnan cu ta reina den gremio comercial, manera treci dilanti den e edicion aki, tambe ta preocupa ATA. Sinembargo nan no a enfoca mucho riba e punto aki den e reunion cu formado.
