Horcan Irma tabatin su impacto indirecto riba nos isla su industria turistico.
Durante e dianan aki, Oficina di Turismo Aruba (ATA) mester a atende cu e asunto di cancelacion di vuelonan for di Merca cu a conduci cu ATA mester a pospone nan conferencianan anual cu nan socionan di Merca conoci como ATCA. Esaki a keda posponi pa otro fecha cu ta habri ainda.
Nos obstante, ATA a continua cu nan evento di celebracion di Dia Mundial di Turismo cu a tuma luga na Hyatt Hotel, ayera mainta. Tabatin presencia entre otronan di miembronan di parlamento, pero e biaha aki minister di Turismo no tabata presente.
Solidaridad
Director di ATA, Ronella Tjin Asjoe-Croes a declara na Bon Dia Aruba cu hunto cu nan partnernan den turismo nan ta bin atendiendo cu e situacion aki. Nan no ta spera nada abnormal, pero si cierto cambio repentino den aviacion pa via di e horcan Irma.
E ta kere cu tur cos lo sigui bek normalisa pronto. Ya cu Aruba ta sigui habri pa negoshi, mientras desafortunadamente otro destinacion den Caribe no por bisa mesun cos. Automaticamente e turistanan cu ta buscando otro destino den Caribe of bishitantenan cu tabata bayendo otro destinacion, lo considera Aruba como un di e opcion nan aki.
Solidaridad
Pero na prome instante e ta kere cu ATA representando e marca Aruba nan mensahe ta uno di solidaridad pa loke ta trata no solamente e area di Caribe, principalmente reinado Hulandes, pero tambe Merca. E ta haya cu e mensahe di solidaridad ta lo primordial den e momento aki.
Igualmente ATA ta lidera e sector di turismo den e structura nacional di calamidad. E structura aki a wordo activa caba. Esaki ta nifica cu obviamente su persona como directora di ATA, conhuntamente cu nan socionan den turismo, ta trahando pa contribui unda cu nan por cu e situacion cu e horcan Irma a laga atras.
Durante e fin di siman nan tabata identificando e capacidad di cambernan cu tin disponibel pa potencial hendenan cu tin cu bin. Tambe di pashentnan cu a bin di afo y cu nan a wordo ubica hopi lihe.
E efectonan di Irma a trece diferente asuntonan cu ATA mester acomoda pa cu nos principal sector economico. Pero director di ATA a reitera cu na e momento aki e prioridad ta poni riba e solidaridad y ayudo cu nos por brinda. E ta haya cu ta eticamente lo mas corecto como parti di hermandad y convivencia cu mester prevalece den un situacion di calamidad asina.
E impacto pa Aruba nos no lo sinti’e necesariamente, segun sr. Tjin Asjoe-Croes. Sinembargo e echo cu na Merca ta wordo menciona Caribe, hendenan ta kere cu Aruba tambe lo por ta afecta. Den e caso aki ATA ta haci loke normalmente ta haci. Incluso nan tin mas fondo disponibel pa bay mas intenso den promocion di nos producto turistico den e ultimo kwartaal di e aña aki.
“Nos ta cla pa avansa y ehecuta tur loke nos tin di haci.” E ta sigura cu ATA su plannan ta continua keto bay. Igualmente como parti di nan mensahe afo ta cu Aruba ta wordo bendiciona, ya cu nos isla ta riba e frontera di e zona di horcan.
