Pa 34 biaha caba, Aruba Tourism Authority (ATA) a celebra su Annual Tourism Conference Aruba conoci como ATCA, cu presencia di representante di gobierno, parlamento, partnernan local den turismo y un grupo di mas cu 50 socio cu ta bende Aruba su producto turistico principalmente den e mercado di Norte America (Merca y Canada).

Directora di ATA, Ronella Tjin Asjoe-Croes a bisa cu despues di celebra recientemente dos conferencia pa nos mercado di Europa y Latino America, e conferencia aki ta wordo dedica na nos mercado primario pa Aruba. E meta di esaki ta entre otro pa haci negoshi y laga nan socionan conoce aspectonan nobo di experiencia turistico na Aruba.

Crecemento y economia internacional
Na aña 2017 nos ta mira un mercado di Norte America hopi fuerte. Merca a crece cu 11% y e aña aki den e prome kwartaal a crece cu 7% compara cu e mesun periodo di 2017. Canada a crece aña pasa cu 12%, mientras cu te april a crece cu 11%. Directora di ATA a declara cu e aña aki nan tin un meta di crecemento di 3.6% pa Merca y di parti di Canada un 10%.

Pa Latino America, ATA kier logra un meta di crecemento di 17.3% (sin inclui Venezuela), ya cu ta trata di volumen mas chikito di mercado. Pero Europa tambe tin un meta di crecemento pa e aña aki pa asina compensa e caida di e mercado di Venezuela cu tabata e di dos mercado mas importante pa nos turismo, y cu ta mustrando un caida mas pisa di locual ATA a proyecta.

E pregunta cu ta surgi ta, si economia internacional ta presta su mes pa alcansa e metanan aki? Esaki considerando cu turismo semper ta wordo considera un producto of articulo di luho. Segun Tjin Asjoe-Croes, sin duda un factor cu ta pisa hopi y cu ta impacta demanda di turista pa pais Aruba ta economia. Tambe e disponibilidad di nos bishitantenan pa paga pa berdaderamente tuma un vakantie. Ya cu otro factor cu mester tene cuenta ta cu Aruba su producto turistico ta mas caro cu otronan den nos region. Tur esakinan ta mara di cerca cu e situacion economico di un pais.

Den e caso aki, ATA den su proyeccion di crecemento di turista di diferente regionnan internacional ta tene cuenta cu e aspecto di economia internacional. “Ora cu mercado ta duna y ora cu economia ta duna, nos ta purba pusha mas.” Sinembargo ora cu economia no ta duna, e ora ey tambe den cierto casonan ta costa nos mas pa convence nan pa bin Aruba, nos obstante cu e situacion economico di nan pais por ta dificil.

Te aworaki e mercadonan ta reaccionando bon, ya cu nan mester duna resultado hopi mas fuerte pa compensa unda cu por e caida di nos mercado di Venezuela. “Esey nos ta bin ta logra, y nos ta mustra cu nos ta bin logr’e.” E ta haya cu e meta di 3.6% d crecemento na Merca kisas no ta hopi. E tendencia ta mustra cu nos ta surpasando e meta aki, ya cu nos ta creciendo te aworaki cu 7%. ATA ta bay sigui pusha, ya cu aña pasa el a yega crece, y Canada a crece tambe manera e cifranan di ariba ta indica.

El a remarca riba aspectonan cu a contribui pa aumenta e cifra di bishitantenan na 2017. Un di nan tabatin di haber cu e horcan cu a afecta aña pasa diferente destinacion den Caribe, y cu te ainda algun di nan ta sintiendo e impacto. Pero tambe ta debi na diferente esfuerso grandi cu ATA a wordo haci den colaboracion cu tur esunnan presente na ATCA. Mercado di Norte America ta representa 70% di e total di turismo pa nos isla.

Den nan presupuesto ATA ta destina alrededor di 80% pa mercadeo, tanto internacional pero tambe mercadeo local pa ehempel eventonan cu ta wordo organisa na Aruba manera Soul Beach Music Festival. Nan ta eventonan cu ta crea experiencia y ta yuda bende nos producto Aruba. E ta un porcentahe grandi considerando cu ATA su meta principal ta mercadia pais Aruba. Pero tambe ATA ta haci uzo di nan presupuesto pa bin cu inversionnan manera nos siguridad, mantencion di nos playanan, etc..