Director di ATA (Oficina di Turismo di Aruba), Ronella Tjin Asjoe-Croes, ya caba a trece algun targets cu lo bira un reto pa nos turismo pa 2018.

Esaki a tuma luga durante e evento cu ATA a organisa recientemente pa celebra cu anticipacion Dia Internacional di Turismo cu ta tuma luga dia 27 di september proximo. Sra. Tjin Asjoe-Croes a señala un aumento global di e cantidad anual di bishitante cu un 3.7%. Un crecemento entre 2% pa 3.5% pa e Tourism Receipts. Un aumento di 0.8% pa e Revenue per Available Room. Y tambe un aumento di un 7% pa nos turista crucero.

Bon Dia Aruba a puntra e CEO di ATA si e reto aki ta uno halto? El a laga sa cu mirando e resultado di e aña aki, e no ta duda cu e metanan aki lo ta obtenibel otro aña.

Retonan y logronan
E reto pa 2018 ta mantene locual a wordo logra y tambe riba dje sigui crece den volumen di un manera mas modera, pero principalmente pa entrada genera pa turismo (Tourism Receipts). El a menciona pa ehempel cu turismo crucero ta mustra di cera aña cu 16% di crecemento.

El a trece algun cifra a base di cuater indicado basico pa mustra e resultado nacional den sector turismo. E indicadonan aki a mustra un desaroyo den e ultimo 6 aña incluyendo e aña aki tambe. E cantidad di turista ta un indicado, pero e ta haya cu volumen, incluyendo Venezuela ta abou.

E ta reconoce cu e caida di e turista di Venezuela ta keda haci su impacto. Tampoco otro aña nan no ta keda conta hopi riba mercado di Venezuela. Pero ora bo saca mercado di Venezuela fei totalidad tin un aumento danki na otro mercadonan. Merca ta un contribuyente pa e aumento aki, pero tambe otro paisnan, el a bisa.

Segun e year-to-date 2017, 719.813 turista a bishita nos isla, cual ta 6.8% menos cu e mesun temporada aña pasa. Si nos exclui e bishitantenan Venezolano, por mira un aumento di 7.5%, ekivalente na 660.354 bishitante.

Di acuerdo cu Banco Central e asina yama Tourism Receipts, pa cu e prome tres luna (Q1) di 2017, a contribui cu AWG 872.5 miyon den nos economia, cual ta un aumento di 3.5% compara cu e mesun temporada den 2016.

Ademas segun Aruba Hotel and Tourism Association pa e luna di augustus, e Average Daily Rate (ADR) a aumenta cu 5.2% compara cu 2016. Esaki den cifra ta US$ 190.05 na 2016 compara cu US$ 199.97 pa 2017.

Pa e Year-to-Date esaki a resulta den un aumento di 3.7% di US$ 236.16 na 2016 pa US$ 244.96 den 2017. E entrada pa camber disponibel, e asina yama RevPAR a aumenta cu 4.8% di US$ 162.24 na 2016 pa US$ 169.99 na 2017. Pa e prome 8 lunanan di 2017 esaki a aumenta cu 9.5%, na 2016 e tawata US$ 189.34 y pa e mesun temporada den 2017 el a subi pa US$ 207.36

E anochinan ocupa(ORN) pa camber a aumenta cu 0.7% pa augustus 2017 y pa e Year-to-Date 2017 el a aumenta pa 6.7%.

Segun directora di ATA, nan tur ta indicadonan cu ta mustra cu echonan cu e marca Aruba ta fuerte, y locual nan ta haciendo ta keda duna resultado. No obstante cu semper Aruba como producto turistico ta maneha un prijs mas eleva cu otro destinacionnan. P’esey e ta haya cu mester pone enfasis riba e balor cu e hendenan ta haya pa e prijs mas caro cu nan ta paga.