E siman aki miembronan di e ekipo di Aruba Tourism Authority (ATA) tabatin programa un bishita na diferente scol MAVO, pa asina trece cerca nos futuro generacion e conscientisacion riba importancia di nos industria di turismo.

Segun Director di ATA, Ronella Tjin Asjoe-Croes, hopi di nos hobennan tin e percepcion cu turismo tin di haci exclusivamente cu e trabou di waiter, trabou den hotel, etc.

P’esey ATA a dicidi di pone nos hobennan pensa riba con e sector principal aki di nos economia por resulta importante pa nan. Logicamente stimula nan tambe pa compronde mas di kico kiermen traha den turismo. Y mas relevante ainda, ki opcion tin pa nan, ya cu e sector aki ta ofrece tanto posibilidad pa nan desaroya. ATA a mustra nan con otro hobennan profesional ta trahando den turismo y den areanan cu por ta nos hobennan no a pensa riba dje.

“Nos ta spera cu esey por sirbi di motivacion tambe, pasobra na final di dia, turismo lo keda nos industria mas importante pa Aruba,” e halto ehecutivo di ATA a declara na Bon Dia Aruba.

E no ta descarta cu tin otro sectornan cu kisas ta wordo añadi, pero nos mester conta riba nos generacion futuro pa por yuda carga, y tuma over, e trabou cu a wordo haci durante varios decada. Aunke nos producto turistico ta uno madura, ATA ta pusha pa bin cu mas innovacion y esaki ta sigui pa ATA su meta pa futuro.

El a declara cu ATA tin diferente punto di enfoke cu nan ta keda subraya den tur conferencia cu nan ta organisa cu nan partnernan den turismo. Den e caso aki, ATA ta papia di innovacion, pero tambe di un crecemento cu ta para pa un calidad halto di bida. Un calidad halto di experiencia pa e bishitante, pero tambe nan ta pone atencion special riba proteccion di nos recursonan natural y nos cultura. “Algo cu nos ta kere mester bin mas dilanti,” el a bisa.

Den cuadro di Dia Internacional di Turismo cu a wordo celebra siman pasa, ATA a mustra den su actividad diferente iniciativa. Incluso iniciativa cu nan ta lansando tambe pa asina por papia di un desaroyo duradero. E ta haya cu si nos no tin e aspecto ey den balansa – kier men e necesidad di e bishitante cu por duna bo mas balor economicamente, pero tambe e necesidad di nos comunidad cu ta buscando pa medio di turismo un calidad di bida cu ta ekivalente pa su bienestar y esun di su famia; igualmente proteccion di nos recursonan mas importante – pues si bo no tin nan balansa, bo no ta canando un caminda cu ta conforme un desaroyo duradero di nos turismo, el a indica.

Igualmente ATA ta keda pone atencion riba e nivel di calidad di servicio. P’esey den cuadro di Dia Internacional di Turismo nan a organisa cu training cu a conta cu e presencia di shen participante. E aña aki tambe nan a bin cu dos grupo. Un grupo tabata nan socio clave den turismo y den otro seccion separa, e studiantenan. Despues a tuma luga e interaccion entre e dos diferente grupo aki. Tjin Asjoe-Croes a considera e dinamica aki interesante y bunita, ya cu e dos gruponan aki ta masha importante, no actualmente so pero tambe pa futuro.