ATA: Aruba ta riba un nivel halto den mercadeo internacionalmente

Ministerio di Cultura hunto ATA Europe a reuni cu Amsterdam Marketing pa mira con un ciudad manera Amsterdam ta mercadea su mes pa locual ta trata turismo. E delegacion ta consisti di consehero di Ministerio di Cultura, Indra Zaandam,  Anky Vrolijk directora di FMA, representacion di oficina di turismo den Persona di Tirso Tromp y tambe Angelo Tromp cu ta e cultural attaché di Ministerio di Cultura.

Ta interesante pa mira con Amsterdam ta diversifica su producto constantemente. Amsterdam ta un destinacion cu ta hopi compara cu London y New York. Tur tres ta hopi conoci y ta ricibi hopi turista pa aña. Den un forma hopi innovativo Amsterdam ta busca formanan pa compronde e mercado tambe e cambionan den mercado y a base di esaki  ta diseña strategia di mercadeo. Amsterdam Marketing ta comparti cu nan no ta uza e titulo di turista pero mas bien bishitante. Nan enfoke ta riba e aspecto comercial, e bishitantenan pero tambe riba e consumidor local. Durante e dialogo a toca e tema di combinacion di cultura y turismo, con ta e miho forma pa conserva nos cultura den combinacion cu turismo pero pa sigui crea beneficio economico.

Amsterdam Marketing ta mira como prioridad e calidad di producto, pues e calidad di Amsterdam como Producto. Nan no ta mercadea e ciudad cu cosnan comun of cosnan cu tur hende ta asocia Amsterdam cu ne, pero nan semper ta laga e bishitante cera conoci cu diferente aspecto  di e ciudad, ampliando nan producto pa mantene un posicion hopi competitivo riba mercado. Esaki tambe ta halto riba nan agenda mirando cu nan competencia ta keda London y New York ambos ciudadnan hopi innovativo.

E delegacion a nota hopi similaridad den e maneho di Amsterdam Marketing cu e vision y maneho di Minister Otmar Oduber, den e aspecto di diversifica Producto Aruba constantemente, sigui e tendencia internacional pero manteniendo aspectonan local como prioridad. Ta importante pa reconoce e similaridad entre e forma di mercadea Amsterdam y Aruba. Intencion awor ta pa uza e informacion y hermentnan basico pa inclui esaki den e maneho di mercadea nos isla. Den e forma aki nos isla ta mantene un posicion halto y sumamente competitivo compara cu otro islanan den nos region. Na mes momento Aruba ta bira un ehempel tambe, mirando cu nos isla ta sigui pasonan pa ta riba un nivel halto den mercadeo internacionalmente.