ATA a renoba acuerdo cu Comite Olimpico Arubano pa reconoce importancia di desaroya atletanan na nivel deportivo

Diamars ultimo, Aruba Tourism Authority (ATA) conhuntamente cu Comite Olimpico Arubano (COA) a ofrece un conferencia di prensa pa informa tocante e renobacion di un acuerdo cu nan a firma na september di aña pasa cu e obhetivo di identifica atletanan potencial cu por competi riba nivel olimpico.

Ronella Croes, CEO di ATA, a señala cu esaki ta un asociacion “natural” unda nan ta reconoce e importancia di desaroya y cultiva atletanan riba nivel olimpico y nan ta reconoce tambe e balor grandi cu nan tin como embahadornan afo promocionando Aruba, den cual nan ta participa den diferente evento na diferente pais, “sin lubida e gran promocion cu Aruba ta haya den weganan olimpico”.

Croes a sigura cu e asociacion entre ATA cu e mundo deportivo riba su mes ta un topico unda algun biaha ta puntra: dicon esaki si of dicon esaki no? pa nan, segun Croes, e mundo deportivo ta importante debi cu tin diferente motibo tras di esaki: primeramente, nan ta reconoce e hecho cu deporte ta yuda forma e comunidad y tambe ta forma e hobennan den cuadro di asociacion cu nan a celebra diamars ultimo. Di dos luga, den ambito di nan trabou como ATA nan ta envolvi den eventonan local deportivo pa motibo cu nan ta mira e mundo deportivo como un manera pa atrae bishitantenan na Aruba y tambe nan ta considera cu ora nan haci algo e organisacion ta yuda posiciona y promove Aruba den un cierto manera. Di ultimo, el a bisa cu nan ta pone hopi atencion riba e calidad di socionan tambe cu nan tin na mesa.

“Nos ta spera di tur tipo di acuerdo y evento cu esaki tin un calidad tambe mara cune,” Croes a declara.

Como ehemplo di deporte, unda por mira cu ATA ta presente ta Aruba Beach Tennis, KLM Marathon, Aruba Hi Winds y tambe eventonan di golf cu nan a duna aporte na dje, “esaki tambe ta duna nos hende y atletanan local un oportunidad pa competi riba diferente nivel tambe,” el a bisa.

Den acuerdo aki cu COA, nan ta dirigi specificamente pa identifica atletanan potencial cu por competi riba nivel olimpico y yuda COA pa asina nan por haci e trabou di desaroya y cultiva e hobennan aki: “pa nos ta importante pa COA sigui haci su trabou y p’esey tambe e decision di scoge como un di partidonan cu nos ta asocia nos mes cune, duna nos aporte tambe na mundo deportivo,” Croes a comenta.

Esaki ta un acuerdo pa aña 2023 y nan ta spera cu nan lo por mira resultadonan atrobe cu e atletanan sigur ta destaca un biaha mas den nan ramo di deporte.

Wanda Broeksema, presidente di COA, a sigura cu na comienso nan a enfatisa cu esaki no ta un acuerdo di un aña sino cu ta un ‘partnership’ cu ta pa añanan y mester ta algo sostenibel pa nan por wak resultadonan tambe.

“Mi por bisa cu COA ta hopi contento cu e aña aki—aunke nos ta na maart—pero e tabata un aña fantastico pa nos. E bishita di Tomas Bach a yuda hopi pasobra por a wak tambe e trabou cu COA ta haciendo pa comunidad y atletanan. Ta importante pa COA pa nos por sigui bay na e next level y p’esey partnership manera ATA ta hopi importante, hunto cu eventonan cu nos a haci dos siman pasa por ehemplo, pa trece e informacion dilanti di kico COA ta haciendo pa e atletanan, kico nos ta haciendo cu nos fondonan pa wak unda nos atletanan ta bay e aña aki cu ta bay ta hopi y importante pa nos atletanan pa cu e weganan cu nos ta bay tin y tambe pa nos por bay den direccion di Aruba como un sport destination, pasobra nos ta haci hopi cos, nos tin e infrastructura y cu ATA y kisas otro stakeholder nos por yega echt na e meta pa crea un Aruba as sport destination,” el a sigura.

Di su parti, Nicole Hoevertsz, ken ta fungi como secretario general di COA, a gradici e confiansa cu ATA tin den COA, lo cual pa nan ta hopi importante. E aña aki ta bay ta interesante, pa e motibo cu atletanan lo biaha regularmente pa representa Aruba na weganan internacional e aña aki atrobe manera el a sigura. Nan tin 4 wega riba e programa, como Weganan Sur Americano di Playa na Santa Marta, Colombia, Weganan Centro Americano di Caribe na San Salvador, El Salvador, World Beach Games na Indonesia, Bali y Weganan Pan Americano na Santiago di Chile.

“Nos ta contento di haci e conferencia di prensa aki par di dia despues di 18 di maart cu ta dia di Himno y Bandera, pasobra como mundo di deporte nos ta compronde e bunitesa, e acto special di representa bo pais y e bandera di Aruba, sigur ora nan tin exito y e himno di Aruba ta wordo toca. P’esey nos ta embahadornan di pais Aruba y e aña ki atrobe boso lo mira hopi di nos embahadornan representa nos pais orguyosamente,” Hoevertsz a finalisa.