Ayera ATA y Airbnb a firma un MOU historico pa un partnership den mercadeo turistico. En conexion cu esaki Bon Dia Aruba a ricibi e siguiente relato di ATA.
Ayera Aruba Tourism Authority y Airbnb, e plataforma digital pa acomodacion y hospitalidad di mas grandi na mundo, a firma un acuerdo di intencion cu ta duna inicio na colaboracion mas estrecho riba area di coleccion di impuesto, training pa esnan cu ta ofrece servicio como ‘host’, mas atencion pa e nivel di calidad cu ta wordo ofreci, tur como meta; un desaroyo y maneho debido di e fenomeno di ‘sharing economy’ esaki conforme maneho pa cu turismo di Aruba. E acuerdo aki ta e prome cu Airbnb ta cera den Caribe.
“Como e di dos pais cu mas ta depende di turismo na mundo, Aruba a stipula diferente prioridad cu ta inclui; un oferta di acomodacion balansa esaki na bienestar di e consumidor, nos industria y nos comunidad, ofrece experiencia di calidad na nos bishitantenan teniendo na cuenta expectativa y demanda di e bishitante y bishitante desea. Prioridadnan stipula ta exigi entre otro un maneho debido di e fenomeno mundial di ‘sharing economy’, uno cu ta den cuadro di e vision y maneho pa Turismo di Aruba,” Ronella Tjin Asjoe-Croes, CEO di A.T.A. ta comenta. “Aruba ta reconoce cu e fenomeno di ‘sharing economy’ ta parti integral di e industria di turismo di awe y di futuro y ta mira un ‘partnership agreement’ cu Airbnb como un paso clave den maneho debido y dirigi di e fenomeno aki. Hunto como lidernan den industria turistico nos lo agrega mas balor na experiencianan mas autentico mientras cu nos ta sigura un maneho turistico exitoso. “
Pa Aruba y Caribe en general, e presencia di ‘sharing economy’ ta visibelriba e area di oferta di acomodacion. Na 2015 34% di esnan cu a bishita a keda na un acomodacion alternativo, cu ta wordo ofreci entre otro pa medio di plataformanan manera Airbnb. Na 2016 te cu september, 27% di esnan cu a bishita a opta pa keda na un acomodacion alternativo.
Airbnb su presencia pa cu nos turismo local ta creciendo rapidamente. Den e ultimo aña Airbnb a acomoda 13 mil huesped di tur parti di mundo na Aruba. Anfitrionnan di Airbnb na Aruba, normalmente ta gana rond di $4,400 USD pa aña.
“Ta un sumo placer di por anuncia e prome partnership entre Airbnb y un nacion Caribense cu ta un destinacion cu reputacion halto di clase mundial. Airbnb lo traha conhuntamente cu Aruba Tourism Authority pa amplia e capacidad pa atrae e miyones di usuarionan di Airbnb cu ta interesa den experiencianan unico ora di biaha,” Shawn Sullivan, Airbnb su gerente di ‘Public Policy’ pa America Central y Caribe ta comenta. “E colaboracion aki lo duna e bishitantenan mas opcion na momento di biaha pa Aruba, mientras cu ta promove un turismo sostenibel como parti di e economia local di Aruba.”
Na e momentonan aki, Airbnb ta conta cu 1,360 propiedadnan na Aruba, cu ta duna un bon bini na un variacion amplio di bishitantenan na Aruba su playanan, cultura diverso y un escenario culinario delicioso.
Aruba Tourism Authority kier a gradici e ekipo di Airbnb pa nan gran cooperacion. Esnan presente tabata: Shawn Sullivan, Bruno Lewicki, Carlos Munoz y Jasmine Mora. Alabes A.T.A. tambe kier gradici Departamento di Impuesto y Ministerio di Finanzas pa nan presencia durante firmamento di e acuerdo di intencion cu Airbnb, cu ta cubri un aspecto importante cual ta ‘coleccion di impuesto’.Tambe ta gradici Ministerio di Turismo cu tabata parti integral di e logro di awe. Hunto lo forma un grupo di trabou cu lo concretisa e diferente punto di colaboracion.
