Aruba Tourism Authority (ATA) ta informa cu nan a entrega e presupuesto y plan pa 2017 riba 1 di september na minister di Turismo, Otmar Oduber. Sinembargo esaki no ta na tempo.
E informacion aki di ATA ta importante pa e presupuesto di gobierno. Gobierno si a logra siman pasa pa entrega esaki na tempo na parlamento. Pero na comienso di augustus gobierno ya a ricibi e conseho negativo di Raad van Advies cu ta falta informacion crucial pa asina por haci un analisis profundo. Cifranan y informacion cu e Conseho Consultativo a pidi di gobierno tabata entre otro esun di ATA. Nan a haci diferente peticion na ATA y tambe e minister pero no a ricibi esaki. Esaki ta un di e motibonan pa e Conseho pa conclui cu gobierno no mester entrega e presupuesto na parlamento y prome mester percura pa añadi e informacion cu ta falta.
ATA sinembargo a manda e relato aki bou sin menciona e comentario di e Conseho:
“Manera ta custumber, e aña aki na luna di mei ya caba Aruba Tourism Authority (ATA) a cuminsa traha riba plannan y presupuesto pa e aña siguiente. Den luna di juli y augustus varios reunionnan interno a wordo teni y tambe proyeccionnan y plannan pa 2017 a wordo discuti entre Hunta di Supervision y Minister di Turismo Otmar Oduber y e ekipo di maneho di A.T.A. Tambe diferente reunion nan a tuma luga cu socionan den sector priva.
Riba dia 29 di augustus Hunta di Supervision a duna aprobacion na A.T.A. pa e plan y presupuesto 2017. E documento aki a wordo entrega na Minister Oduber dia 1 di september. Minister Oduber a expresa di ta satisfecho cu un biaha mas A.T.A. a entrega su presupuesto na tempo cumpliendo cu rekisitonan segun ley aplicabel pa A.T.A. SG. Pa 2017 a fiha como meta un crecemento di 1% den ‘stay-over arrivals’, esta turistanan di estadia; un incremento di 1% den ‘tourism receipts’; 5% crecemento di turismo crucero y 3.5% di crecemento di e RevPar, conforme informacion ricibi di AHATA.
E ultimo seis añanan turismo a score na un forma satisfactorio y hasta por lo general a surpasa metanan. Considerando e shift den e mercado di Venezuela como resultado di e eliminacion di esunnan cu tabata bishita primordialmente pa haya acceso na e dollar Mericano, meta ta pa absorba e caida aki mas tanto cu ta posibel. P’esey por mira crecemento mas modera (di 1% pa ambos ‘stay-over arrivals’ y ‘tourism receipts’) compara cu añanan anterior. Merca ta instrumental den sigura cu por mantene un turismo stabiel. A fiha como meta un crecemento di 5%. Ambos e region nan di Latino America y Europa mester mustra crecemento den 2017, di 17% y 9% respectivamente.
Mescos cu e aña aki e plan di A.T.A. pa 2017 ta pone hopi enfasis y importancia riba desaroyo di nos producto, cu ta keda un top prioridad. Tambe mas cu claro promocion di Aruba mester yuda carga meta nan fiha. Prioridadnan strategico ta keda ta; crece e ‘average daily tourist spending’, crece e ‘share’ di bishitante afluente pa nos isla, diversifica mercadonan pa asina sigura cu tin un portofolio balansa, sigui pone atencion debido riba ‘airlift’, y sigui enfoca riba e experiencia di e cliente y riba creacion di experiencianan nobo pa medio di desaroyo di producto y promocion debido.
Despues di a amplia mercadonan ultimo añanan, otro aña no lo habri mercadonan nobo, pero lo pone esfuerso den esunnan existente incluyendo Mexico cu ta esun di mas nobo. Diversificacion lo ta un meta, pero dentro di Merca. Sharing economy lo sigui haya e atencion debido, como tambe siguridad, nos playanan, y tambe aruba.com cu ta ser rediseña actualmente y lo wordo lansa den su bachi nobo otro aña. Tambe A.T.A. lo update su Plan di Maneho otro aña y fiha pues e direccion y proyeccion nan pa e proximo 4-5 aña. Conforme patronchi di comportacion di e Venezolano afluente -kende a bin ta emigra pa varios pais- como parti di e strategia pa atrae a bishitante nan aki cu tin un patronchi di gasto atractivo, no solamente lo sigui cu esfuersonan hopi dirigi den e mercado mes, pero tambe lo enfoca riba e comunidad Hispano Americano, pa ta specifico e Venezolanonan biba eynan, na e parti sur di Florida.
Conforme presupuesto presenta pa 2017, 59% di A.T.A. su presupuesto lo bay na promocion, 20% na desaroyo di nos producto, 16% na gastonan operacional y ta proyecta cu 5% di e presupuesto lo keda como un resultado positivo netto. Manera ley ta prescribi Minister lo provee e plan y presupuesto di A.T.A. na parlamento, kende tin 10 dia pa por revisa esaki y comenta si ta necesario. Despues di e fase aki Minister por aproba e plan y presupuesto di A.T.A.”
