Den e dianan aki cu un tormenta di friu y sneeuw a suta gran parti di Merca, a conduci cu Oficina di Turismo di Aruba (ATA) a tene contacto cu nan diferente socio, tanto na Merca como na Aruba tambe.
E asina yama ‘Sprawling Storm’ a ocasiona cu entre diabierna y diasabra, mas cu 2 mil vuelo a wordo candela na Merca. ATA a sigui di cerca e desaroyo aki, pa motibo di e mal condicion di tempo cu a conduci na ceramento di aeropuertonan y cancelacion di miles di vuelo for di nos principal mercado turistico y considerando posibel cancelacion di vuelo pa Aruba.
“Di parti di aeropuerto nos no a haya nada di cancelacion,” asina ayera prome cu merdia, directora di ATA, Ronella Tjin Asjoe-Croes a laga sa na Bon Dia Aruba. Nan no a ricibi for di aeropuerto niun informacion di cancelacion di vuelo diasabra ultimo. Cu esaki e no kiermen cu eventualmente no tabatin cancelacion, pero ‘nada pa alerta nos’, el a bisa.
Promocion.
Tin un refran cu ta bisa: ‘Na mal tempo, bon cara’ y esaki ta loke ATA kier probecha. A pesar di e tormenta di winter aki, ATA ta mira esaki como un oportunidad pa incentiva nan promocion, pa asina canalisa mas turista Mericano pa bin Aruba y disfruta di nos clima Caribeño y calor di nos hendenan. Y pa logra esaki nan ta saca probecho di e recursonan cu e era digital aki ta ofrece.
Tjin Asjoe-Croes a bisa cu ATA a activa su promocion na Merca. Mientras cu canal di television, por ehempel CBS ta duna cobertura riba mal tempo, tambe nan ta menciona Aruba pa promociona nos destino como un bon escogencia pa disfruta di un clima mas agradabel. Ya cu e condicion di tempo ta parti di e promocion cu habitualmente Aruba ta realisa na Merca.
El a bisa cu ATA su strategia y planificacion pa Merca semper ta inclui consideracion riba estado of comportamento di clima. Nan tin diferente promocion y publicidad cu ta saliendo ariba canalnan digital, entre otro riba e billboard den diferente estado di Merca y ciudadnan manera Boston, New York, Philadelphia y Chicago, cu ta duna informacion tocante situacion di clima y temperatura. Y tambe nan ta divulga informacion y promocion di Aruba online. Parti di e promocion cu ATA a traha riba dje ta mensahe meteorologico di Boston di nos pelotero Xander Bogaerts cu ATA ta activa.
Ta asina cu e publicidad digital relaciona cu e temperatura friu y sneeuw lo ta activa durante e luna aki. Entre mas friu e cantidad di mensahe referi na e tempo y Aruba, ta aumenta. Kiermen si e tempo ta malo y si tin hopi friu, ta bon momento pa pensa riba Aruba. E tipo di promocion aki ta aumenta of ta baha conforme na e temperatura. Si tin menos publicidad y promocion di Aruba mara na tempo na Merca, tin otro tipo di mensahe tambe cu ta promove Aruba, segun directora di ATA.
Sprawling storm.
Sprawling storm ta un tormenta di sneeuw di winter den expansion cu a suta e costa west na principio di siman pasa. E situacion aki a produci cantidad di cancelacion di vuelo den e aeropuertonan mas concuri di Merca.
Servicio Meteorologico Nacional di Merca a emiti aviso di clima di winter pa gran parti di midwest y Mississippi, creando tormenta di winter den expansion y fuerte sneeuw y bientonan fuerte di mas cu 50 mph.
