ATA: 15.1 miyon Florin pa caha di Gobierno di Aruba

ORANJESTAD – ATA recientemente a entrega oficial di su cuenta anual 2015 na Gobierno di Aruba. E resultado netto di esaki ta significa un suma no menos di 15.1 miyon Florin pa caha di Gobierno di Aruba. E suma aki ta wordo traspasa pa gobierno e aña aki, despues cu aña pasa tambe a logra un resultado positivo di 10.3 miyon Florin. 

CEO di ATA Sra. Ronella Tjin Asjoe-Croes conhuntamente cu Presidente di hunta di Supervision di ATA Sr. Jossy Lacle a haci entrega oficial na Minister di Turismo. 
Minister Otmar Oduber ta sumamente contento cu e resultadonan sumamente positivo di un instituto cu pa 5 aña consecutivo ta cumpli cu ley y ta haci entrega di su relato anual pa aña 2015. 

Minister Oduber ta indica cu ta trata aki di un departamento cu antes tabata costa Gobierno di Aruba mas of menos 37 miyon florin pa aña. E suma miyonario aki cu tabata sali for di fondo publico, banda di impuestonan cu tabata wordo cobra manera ta ‘room tax’. Minister Oduber ta indica cu desde 5 aña pasa nos ta conta cu un instituto para riba su propio pia, cu no solamente awor ta cubri su gastonan, pero cu anualmente dunando resultado positivo contribuyendo bek na e fondo cu antes nan tabata depende di dje.  ATA Sui Generis na un forma transparente ta mustra e resultadonan pa loke ta 2015 unda cu ta resalta un logro di 5% mas na entrada cu locual a pronostica y a gasta 13% menos di loke a presupuesta.
“E aña aki nos ta papia di un suma di mas of menos 17 miyon florin cu a wordo genera adicional. Pa prome biaha por papia tambe di un fondo di reserva cu ta conta cu casi 20 miyon florin. Adicional por papia e ora cu Gobierno ta ricibi 15.1 miyon florin como resultado netto for di ATA.”  E relato anual di ATA Sui Generis pa aña 2015 na su turno awor lo bay Parlamento di Aruba manera cu ta stipula den ley.

E rapport financiero ta conta cu un investigacion riguroso cu ta wordo haci tur aña pa un oficina di accountant independiente. Pa di 5 aña ATA a sa di cumpli cu tur e rekisitonan conforme ley, cu tin tambe ‘goedkeurende verklaring’ un biaha mas cu ta confirma e maneho financiero debido ta wordo efectua na oficina di turismo.  A base pro-activo por bisa tambe cu ATA tur luna ta haci un auditoria dor di un compania independiente na oficina di turismo pa asina cu yega fin di aña e compania di accountant por haci su trabou mas efectivo tambe. Banda di tur esaki e aña aki Central Accountant Dienst tambe a haci un investigacion na ATA cu tabatin resultadonan positivo cu ta confirma un biaha mas e maneho responsabel di  ATA Sui Generis.

Comunicado gobierno