E partidonan di coalicion mester mustra cara
Den e asunto Serlimar tin algun desaroyo interesante. Di un banda nos tin e aspecto di e cliente di e compania, cu ta haya tende cos cu cual nan no necesariamente ta di acuerdo. No ta tanto e hecho cu mester paga; cada ciudadano cu dos placa di tino ta comprende cu tur cos ta anos como consumidor ta paga. Si no haci’e via un suma pa paga na Serlimar, gobierno ta cobra esaki di otro manera. Por tin discusion tambe si tur hende ta paga mescos of ta cobra hogarnan di menos recurso un suma mas modera. Esey ta un opcion, cu sin embargo tin su limitacion legal actualmente, manera e ley di Serlimar ta na e momento aki. Nos a bay ampliamente riba e aspectonan aki den nos edicionnan di ayera y diasabra.
Pero, a base di e expresionnan di e ministro concerni, y e esaki ta e punto di conflicto grandi actualmente, ta comprende cu Serlimar lo bay cobra tur adres (di vivienda) independientemente si nan ta cu Serlimar of otro compania. Den nos edicion di ayera nos a publica e formulario cu Serlimar tabata uza algun aña atras, pa atende e clientenan cu tabata desea di tin un contract cu un otro compania y por lo tanto no mester di e servicio di Serlimar. Esaki mira for di punto di bista legal, no ta asunto pa djis ignora, pero por ta cu e ekipo di asesor di e ministro no a yega na e punto aki ainda. Practicamente e tempo ey Serlimar a reconoce cu nan no tin un monopolio riba e tereno aki y e ley riba Serlimar y su Memorie van Toelichting no ta duna espacio pa esey tampoco. Ta facil pa djis vocifera e opinion cu si ta asina, otro cos ta pa haya rason den un corte.
Den tur esaki, ta remarcabel e silencio di e empresa(nan) cu ta e competencia di Serlimar. Ta nan tambe lo mester contesta pregunta di nan clientenan di kico ta pasando y ki posicion nan tin den henter e asunto aki. Tin un acuerdo cu nan riba e punto aki? Con nan tin pensa pa maneha e asunto, pasobra bo no por habri man laga un negoshi operativo cay…Nos lo tende na su debido tempo.
Banda di esey tin e discusion entre e partidonan den coalicion, cu tin aparentemente un diferencia di opinion tocante kico lo mester sucede, en todo caso a corto plazo. Nan discusion ta concentra riba e punto cu segun e partido grandi den gobierno, a pone placa disponibel pa Serlimar, mirando cu e discusionnan tocante kico exactamente mester sucede, encuanto cobra, ken y cuanto, ta andando ainda. Masha bunita pa scoge e angulo aki pa ta critico cu e ministro, pero e no ta bay libra e partido aki di mester expresa nan opinion tocante e asuntonan cu ta concerni e ciudadano, e cosnan cu nos a menciona anteriormente, y specialmente e eventual pago dobel, den cual ta dificil pa nan bay apoya e ministro pa tene tur cos nechi den e coalicion.
Pero tin mas cos riba cual e partnernan den coalicion lo mester vocifera un opinion. Ta dificil pa pretende cu bo ta forma parti di e organo legislativo di nos pais, pero no ta duna opinion tocante e malabarismo legal cu e ministro aki a inicia. Lo yega un momento cu mester bisa te aki y no mas. Esaki lo conduci na problema grandi den e coalicion? Por ta, pero lo ta bon si tur esunnan envolvi mantene cabes friu y busca un base comun, funda riba e puntonan di acuerdo y riba argumento solido. Kico por ehemplo ta e aspectonan riba cual tin un acuerdo caba? E ministro mes a referi na e texto di e acuerdo di gobernacion, cu no ta contene absolutamente nada di e asunto di cobra, y mucho menos di con ta cobra. Ta parce anto hopi necesario pa como coalicion yega na acuerdo mas elabora, pasobra e ministro tin cu por sigui cu su maneho, unda no por critica su persona pa su dinamismo, si pa con e maneho mester ta.
Awor, e ministro tin algo di rason ora e bisa cu e no mester di un acuerdo di gobernacion pa e haci loke ley ta bisa, y esey ta cu e compania Serlimar pa ley ta autorisa pa cobra su clientenan pa e servicio cu e ta duna. Esey ta corecto, pero cu e limitante, y ta aki ta unda e ministro ta desvia di e caminda legal bay cay den rooi, cu no por institui un tarifa social, ni tampoco obliga tur usuario paga Serlimar y riba esey, si nan ta desea, paga un otro tambe cu ta berdaderamente haci e trabao.
Cu tur esaki sucediendo, nos tin un situacion un poco peculiar. E publico, specialmente esunnan cu tin contract cu otro compania, ta rabia pa e imagen cu e ministro a crea di dobel pago, y no ta haya contesta. E partidonan den coalicion, en todo caso e dos nan mas grandi, ta hungando poker, sin contesta e inkietudnan di e publico. Y oposicion ta sinta hari, contemplando con e showdown aki ta bay termina.
