E noticia cu a sali cu gobierno tin plan pa uza e veld di Dakota pa refugiado Venezolano trece pregunta si Cruz Cora como bisiña ta envolvi.
E oficina di Cruz Cora ta banda di e veld y Bon Dia Aruba a puntra e organisacion si esaki ta coincidente. Indra Anthony Pereira ta bisa cu nan tabata sa pa basta tempo cu gobierno tin e intencion pa traha un campo pa refugiado Venezolano na e veld patras di nan. Sinembargo e kier enfatisa cu nan no ta un departamento di gobierno cu ta fungi como Auxiliar di gobierno durante crisis, sino un organisacion independiente.
“Esaki kiermen cu den cualkier situacion di crisis, gobierno ta pidi asistencia di Cruz Cora como Auxiliar pa defende y monitoria cu derechonan y dignidad humano wordo respeta. Tur ser humano tin derecho riba un dak riba nan cabes, awa, cuminda, asistencia medico y paña. Tur mucha tin derecho riba siguridad y educacion.”
Cruz Cora di Aruba ta sigui splica cu den e caso aki esaki no ta nada diferente. “Gobierno di Aruba ta e responsabel pa desaroyo y ehecucion di e plan aki, y Cruz Cora por asisti unicamente pa cumpli cu leynan internacional di derechonan humano. Mester remarca tambe cu Aruba a firma un tratado internacional di refugiado di Nacionnan Uni y mester a tene su mes na esaki. Esaki ta encera cu personanan cu huy for di nan pais pa nan bida, no por wordo manda bek nan pais di origen.”
Condicion
Den e plannan di gobierno di prevencion e organisacion si ta menciona y hasta cu gobierno ta considera cu Cruz Cora lo asumi cierto tarea. E organisacion ta sinta na mesa cu gobierno pa cu e plannan di calamidad pero kier enfatisa tambe cu no tin un acuerdo cu gobierno ainda pa nan por tuma cierto tareanan. Tareanan cu segun e tratado ta na comienso responsabilidad di gobierno. E organisacion a bisa cu nan ta dispuesto pa haci cierto tarea pero cu e ora gobierno mester cera un contracto cu nan pa asina nan tambe por cuminsa haci trabou di prevencion.
Un condicion tambe ta cu gobierno lo bin cu fondonan pasobra Cruz Cora mes ta depende riba boluntarionan y donacionnan. Pues si gobierno kier depende pa cierto tarea riba e organisacion, e mester ta dispuesto tambe pa aloca fondo pa Cruz Cora por haci e trabou aki.
