Mientras no por duna claridad riba con a calcula e suma di 6,8 miyon mensual pa ricibi 500 refugiado Venezolano, Hulanda ta distancia nan mes di ofrece ayudo financiero na Aruba en caso cu un exodo Venezolano yega nos isla.

Nacionnan Uni su agencia di refugiado (UNHCR) manera a indica anteriormente ta haci un peticion na gobiernonan regional Latino Americano y Caribense pa percura cu migrantenan Venezolanonan den situacion di riesgo haya un trato husto y humano pa loke ta trata acceso na instrumentonan oficial pa legalisa, sea por medio di procedura di asilo of otro procedura estableci nacionalmente pa e paisnan regional.

Polemica
Siman pasa esaki a crea un polemica unda prome minister Evelyn Wever-Croes (MEP) mester a aclaria cu e nota di UNHCR no ta un exigencia pa Aruba ni otro pais regional cuminsa acepta refugiado Venezolano, si no pa brinda nan un trato humanitario.

E documento cu UNHCR a saca net despues apropiadamente titula Situacion Venezuela: apelacion supletorio januari – december 2018 ta reconoce cu aunke ta evidente cu no tur persona Venezolano emigrando di nan pais ta haci esaki cu rasonnan relaciona cu status di refugiado den mente, ‘ta birando mas y mas cla cu un cantidad di persona berdad ta den necesidad pa algun tipo di proteccion internacional’.

Aspecto humanitario
Aunke cierto paisnan manera Colombia y Brazil a establece cierto proceduranan special pa Venezolanonan por yega na un status legal na e paisnan, UNHCR ta subraya den e documento cu hopi di e migrantenan ta haya dificultad pa sigura nan status legal. Di e manera aki nan ta haya nan mes sin acceso regular na servicionan nacional manera seguro medico y educacion, alabes treciendo e riesgo pa enfrenta mas explotacion, discriminacion of xenofobia, segun UNHCR.

Actualmente segun nan, un total di 22 aplicacion pa haya status di refugiado na Aruba a drenta di 2014 te actualmente. Aunke segun e departamento encarga cu procesa e peticionnan aki Dimas niun status di refugiado a keda otorga te awo pa nan, tin personanan cu despues a haya un rechaso y a apela den un trayecto normal.

Sinembargo e documento di UNHCR ta calcula cu mas o menos 98.500 Venezolanonan ta migra bay region Sur Caribense, unda segun nan Trinidad & Tobago tin e populacion mas halto di Venezolano na 40 mil mas o menos. Algo di nota ta cu segun nan informacion tin un cantidad di 20 mil Venezolano cu ta yega Aruba. Por haya mas informacion riba e website di UNHCR, unda por download e documento.

‘Refugiado no ta responsabilidad di Hulanda’

Den luz di un crisis cu ta escalando gobierno di Aruba a pidi gobierno di Reino pa nan conseho con miho pa trata un posibel exodo Venezolano na nos isla si crisis humanitario sigui intensifica. Manera nos a publica siman pasa, prome minister ta wardando e e liña di informacion di relacionnan exterior di Reino pa haya sa con pa sigui dilanti. Con leu esaki a yega nos no a tende te ainda. Pero e aspecto financiero lo keda un punto dificil, mirando cu gobierno di Aruba mescos gobierno di Corsou lo kier a pidi ayudo financiero pa e tema ki na Hulanda. Pero awo parce cu esaki no lo ta posibel.

1 dia prome cu nos celebracion di Himno y Bandera secretario di estado Raymond Knops di relacionnan di Reino a declara na nos partner den noticia Ret Karibense cu ‘Aruba no por conta cu cartera di Reino pa yuda refugiado Venezolano’.

Sr. Knops a indica cu e asunto di refugiado no ta un responsabilidad di Hulanda, si no cu ta trata aki di un ‘asunto di e paisnan individual’. Anteriormente e secretario di estado a nenga di traspasa refugiadonan Venezolano pa Bonaire si Aruba tuma nan.

Sinembargo e secretario di estado Hulandes a splica cu Hulanda ‘no lo laga e islanan riba nan mes’ si no cu lo ofrece experticio relaciona cu migracion y asilo na ambos Aruba y Corsou. “Nos tin palabracionnan caba riba e asunto ki. Pero den sentido formal esaki no ta nos responsabilidad.”

‘Dificil pa prueba cu ta trata di refugiado’
Kende ta bin na remarca pa bira un refugiado sea den cuadro di persecucion politico of pa via di miedo pa su siguridad ta dificil pa determina. Asina minister di husticia Andin Bikker (POR) ta splica. “Tin un diferencia entre personanan cu ta bin nos isla pasobra situacion na Venezuela ta dificil y personanan cu por demostra cu tin peliger pa nan bida si nan bolbe Venezuela. E di dos dimension– pa bin na remarca pa asilo ta masha poco persona por prueba esaki.”

No por splica con a calcula cifra di 6,8 miyon

Manera gobierno di Aruba a indica anteriormente, nan a pone un suma disponibel pa trata cu e asunto aki den presupuesto di gobierno pa aña 2018 di 2 miyon florin. E suma aki, manera director di Rampenbureau Rino Hermans a indica anteriormente ta solamente facilita un posibel situacion di prome auxilio pa ricibi refugiado.

E mesun director den un combersacion cu Bon Dia a splica cu pa ricibi 500 refugiado Venezolano lo costa Aruba mensualmente un suma di 6,8 miyon. Despues di e combersacion nos a papia cu sr. Hermans pa haya sa con a bin na e calculacion aki, pero el a nenga di duna un splicacion. Segun sr. Hermans e lo mester haci mas sondeo prome cu e por splica con a yega na e suma aki. El a splica cu pa fin di luna di april e lo por duna mas splicacion.