Hefe di Inmigracion, sr. Gerald Vingal a duna un declaracion breve na Bon Dia Aruba riba diferente puntonan relaciona cu su trabou. El a reacciona contra un articulo cu a sali publica den un matutino local cu ta referi cu e lo a nombra un PR cu un salario halto.
Sr. Vingal a bisa cu esaki no ta cuadra cu berdad, pero el a laga sa cu na su debido tempo e berdad rond di e asunto aki lo sali na luz publico. P’esey e no kier drenta den un discusion riba e topico aki.
TOPA
Igualmente el a referi na e constante critica cu e ta haya fei sindicato TOPA. E ta kere cu e tipo di critica sin base ta afecta esfuersonan cu e ta bin ta haciendo pa mantene un bon ambiente laboral y pa stimula e trabou cu e personal di inmigracion ta bin realisando. E ta haya cu e critica aki ta wordo hinca den un contexto politico. Sr. Vingal ta lamenta e critica di TOPA, mientras cu e lider di e organisacion sindical cu ta un funcionario di e departamento aki ta abstene di participa den e reunion cu nan ta organisa mensualmente unda ta wordo debati tur loke ta concerni nan trabou.
Control di inmigracion
Otro punto cu sr. Vingal a referi tin di haber cu e control stricto cu personal di inmigracion ta bin realisando. El a indica cu no ta berdad cu nan ta laga drenta e Venezolanonan cu ta bin cu otro intencion menos esun di haci turismo riba nos isla.
El a indica cu antes prome cu nan lo por drenta Aruba, nan tabata check den mashin di ATM si berdad nan tabatin e cupo di placa cu CADIVI a asigna nan pa bin Aruba. Pero mirando cu e proceso aki tabata ocasiona un tardansa y tabata afecta e operacion na aeropuerto, nan a cuminsa exigi cu e Venezolanonan cu supuestamente ta bin haci turismo mester mustra e placa cash. Pa loke ta trata e bishitantenan Colombiano e exigencia aki no ta conta, pero si nan mester mustra nan credit card of si nan ta bay keda den cas di famia, mester mustra un carta di garantia.
Tambe sr. Vingal a referi na e problematica di e virus di Zika. Den su declaracion duna diamars ultimo, el a bisa cu unabes cu organisacion mundial a declara Zika como un malesa mundial, nan ta wardando decision di Ministerio di Salud Publico pa bin cu e protocol cu ta wordo aplica den un caso asina.
