Anne McClaine ta acusa di horta identidad y haya acceso na record financiero priva for di Stacion Espacial Internacional.
E astronauta di NASA, McClain, kende a pasa 203 dia den espacio abordo di Stacion Espacial Internacional (ISS na Ingles) e aña aki, ta acusa di horta identidad y haya acceso indebi na record financiero priva di su casa, awo separa, segun un reporte di New York Times. McClain, un teniente coronel di ehercito Mericano, tabata ingeniero di vuelo pa Expedicion 58/59 na ISS y tabata prepara pa forma parti di e prome caminata espacial enteramente femenino. Ta durante su tempo abordo di e stacion cu el a haya acceso na e cuenta di banco di Summer Worden.
McClain y Worden tabata casa desde 2014. Worden a pidi divorcio na 2018, algun luna prome cu McClain mester a biaha pa un mision di seis luna na ISS. McClain, a traves di su abogado, a reconoce cu el a haya acceso na e cuenta di banco uzando un password, cual el a yega di uza anteriormente. E acceso tabata pa sigura cuido di yiu di Worden, kende e pareha tabata lantando hunto. Worden a entrega un keho acusando robo di identidad, tanto cu e Comision Federal di Comercio y e Oficina di Inspector General di NASA.
E Acuerdo di Stacion Espacial, firma pa Merca y 14 otro gobierno involucra, ta delinea e marco legal gobernando actividad den e stacion. Cada nacion ta legalmente responsabel pa su elementonan, ekipo y personal, y pa aplica nan propio ley nacional den asuntonan criminal.
Oficina di Inspector General ta investigando e keho. McClain a subi Twitter dia 24 di augustus pa nenga e acusacion, bisando cu e tin tur confiansa den e investigacion.
