AstraZeneca ta pidi FDA autorisacion pa tratamento di anticuerpo contra COVID-19

(AP) – AstraZeneca, e trahado di medicina cu a desaroya un di e prome vacunanan contra COVID-19 a pidi e U.S Food and Drug Administration (FDA) pa autorisa uso di emergencia di un tratamento di anticuerpo pa preveni e malesa cu lo ta e prome di su clase.

E compania Anglo-Suiso a bisa riba diamars cu e tratamento conoci como AZD7442, lo ta e prome combinacion di anticuerpo cu ta actua a largo plaso cu lo ricibi autorisacion di emergencia pa prevencion di COVID-19. Si keda autorisa, e medicina probablemente lo ta limita na personanan cu un sistema inmunologico cu ta comprometi y no ta ricibi suficiente proteccion di e vacuna.

“Na prome luga, nos kier proteha e poblacion di e personanan cu ta vulnerabel y no ta adecuadamente protegi pa e vacuna,” Menelas Pangalos, AstraZeneca su cabesante di investigacion y desaroyo a declara. “Pero ultimamente, e ta keda na man di autoridadnan di salud pa saca afo ken nan lo scoge pa inmunisa.”

Pangalos a bisa cu e compania su formulacion ta diseña pa aumenta inmunidad pa te hasta un aña, compara cu e otro medicina cu ta ofrece un of dos luna di proteccion.

FDA a autorisa tres otro medicina a base di anticuerpo, incluyendo dos cu por ricibi despues di ta exponi na COVID-19 pa evita sintoma. AstraZeneca su medicina lo ta duna como un medida di prevencion den personanan cu ta hopi mas vulnerabel na e virus.

FDA ta keda enfatisa cu e medicina di anticuerpo no ta un substituto pa vacunacion, cual ta e manera mas efectivo cu ta ofrece proteccion contra e virus den termino largo. Medicina di anticuerpo tambe ta hopi caro pa produci, y ta rekeri un inyeccion y trahadonan di salud pa por duna esaki.

Testnan den su ultimo etapa a demostra cu AstraZeneca su medicina di anticuerpo a reduci e riesgo di desaroya COVID-19 pa 77%. Mas cu 3 cuarta parti di e participantenan tabatin sistema inmunologico comprometi a causa di cancer, lupus y otro condicionnan cu tabata haci nan hopi mas probabel pa desaroya malesa severo.

Pangalos a bisa cu e compania su medicina lo provee “un opcion adicional pa por protege contra COVID-19 banda di vacuna.” E compania tambe lo pidi autorisacion regulatorio na Europa y otro region mundialmente tambe.

E medicina ta version traha den laboratorio di e anticuerponan cu ta blokia e virus cu ta yuda combati infeccion. E tratamento ta yuda e pashent pa medio di suministra dosis concentra di un of dos anticuerpo.