Asombro pa situacion financiero di Aruba?

Awor no mas?

Awor no mas? Loke a capta nos atencion recientemente tabata un articulo cu a aparece den Antilliaans Dagblad, tocante e (pa nan) recien descubri off balance debenan di pais Aruba, cu ta haci nan yega na e conclusion cu e situacion financiero di Aruba ta hopi mas malo di loke a pensa anteriormente.

Nos lo kier bisa: Welcome to the club, aunke e trein a bay laga nan hopi tempo pasa caba. Aparentemente ta e publicacion reciente di e rapport di Rekenkamer a atrae nan atencion y a trece e topico di e extra debenan aki bao di atencion di prensa pafo di Aruba.

Na luga di bay keda asombra cu e casi inocencia asina di prensa pafo di Aruba, pa algo cu pa nos, sigur den prensa ta algo conoci desde varios aña, lo ta bon pa nos reflexiona con por ta cu pafo di nos isla ainda ta solamente de bes en cuando e realidad aki ta penetra. Kico por ta cu nos mes, como prensa, pero tambe e anterior oposicion politico cu tabata lucha contra e gastamento di placa fia aki na gran escala di e anterior gabinete, no a haci bon cu ta te awor aparentemente eyfo tin hende cu ta realisa e gravedad di e situacion financiero den su magnitud total?

Pa cuminsa, nos ta kere cu loke tabata penetra mas cu tur cos cerca e medionan na otro teritorio di Reino, na Hulanda y e islanan, tabata e mashin di propaganda di e anterior gabinete, cu nos mes como ciudadano tabata financia. Involuntariamente, esey si. Tur e medionan den e otro partinan di Reino tabata haya un fluho di informacion, incluyendo e publicacion riba e glossy paper mas caro cu tin, cu tur e storianan bunita tocante e hazañanan di e gabinete. Inclusivo e teorianan economico di e anterior prome ministro, cu tabata kere sagradamente den gasta placa, pa pone economia draai.

Lamentablemente, tanto pe y mas ainda pa nos, su teoria no tabata bal e papel riba cual e tabata skirbi. Y pakico asina? Pasobra den un economia chikito, cu ta importa tur cos pa come, bisti y core, bo no ta inverti stimulando bo mes economia, pero tur e placa inverti ta end up den exterior y e empleo crea ta solamente temporal. Awor aki nos por lesa den e corant menciona cu nan ta yama e publicacionnan di Mike Eman y su aliadonan ‘public relations met veel goedweerpraatjes’ pero esey ta loke apenas nos ta haya tende awor. Tur e tempo cu e emperador no a cay, mayoria di medionan den Reino tabata reproduci loke e emperador tabata publica.

Awor cu e emperador a muri, awor nan publico por haya esaki di lesa. Y ainda nos por nota cu esun of esunnan cu a haci e trabao, a haci mita trabao, pasobra no ta menciona exactamente unda e debenan scondi aki ta pone Aruba financieramente. Nan ta constata cu Aruba su corelacion di debe vs GDP ta 87%. Esey ta corecto, si bo no tuma e debe off balance na cuenta. Pasobra ta debe e ta, aunke lo tin hopi cu ta bisa cu no. Kico ta un debe? Un debe ta cu bo a haya placa directamente, o bo a haya un algo material, un cas of un auto, anto bo tin e compromiso pa paga esaki na esun cu a fia bo. Nos sa cu tin sabio ta bin bisa: ‘si, pero e debe no ta di pais Aruba, tin un fundacion memey cu tin e debe’. Si, bunita, pero ken tin e compromiso cu e fundacion pa paga durante tanto aña tanto placa na e fundacion? No ta gobierno? Y ademas, tin compromiso cu si ta directamente debe di gobierno, pasobra e compromiso ta directamente cu esun cu a entrega e obra, manera den e caso di Green Corridor o e ringweg. Na aña 2013 caba, den un di e entrevistanan cu IMF, a toca e tema aki, unda e delegacion a laga sa bon cla cu esaki por wel di ta off balance, pero ta ken finalmente tin e obligacion di paga? Y ta con yama e cos ey anto…? Debe. Pero tin algo mas cu ta haci e asunto mas dramatico. Un debe di un prestamo di bono ta algo cu bo por renoba ora e madura, pagando solamente interes. Por ta cu bo ta paga mas interes pasobra bo ta un riesgo mas grandi pa esun cu kier fia bo. Pero en todo caso bo por pusha e debe pa mas leu den futuro. No recomendabel, pero posibel. E debenan off balance aki no, mester paga nan segun e schema di pago, capital y interes, pase lo que pase.

Y e peso total di e compromisonan aki ta suma casi 100 miyon florin extra riba presupuesto, cada aña pa hopi aña. E pregunta anto pakico Rekenkamer ta yama e cosnan aki ‘riesgo pa futuro’? Den nos concepto, nan no ta niun riesgo, pasobra nos sa exactamente na cual palo e gabinete anterior a colga nos. Loke si e gabinete actual por siña di e anterior, ta con ta haci PR, pero si cu e perspectiva y cifranan realistico riba mesa, y sin edicion glossy.