ASOCOL ta recauda fondo pa gasto funerario di Sr. Arnulfo Ortega: Caso di personanan ilegal pa basta aña ta comun na Aruba

Un biaha mas, Asociacion Amigos de Colombia (ASOCOL) ta haci un yamado di solidaridad y humanidad na henter comunidad di Aruba, y particularmente esun Colombiano.

Presidente di e asociacion aki, Moises Fernandez a declara cu nan ta den e proceso di recaudacion di fondo pa cubri e gasto funerario di nan paisano, Arnulfo Ortega, kende a fayece diadomingo anochi.

El a relata na e matutino aki cu un luna pasa, nan a wordo acerca di auspicio cu ta un cas di cuido paleativo pa e persona cu ta den fase terminal. Ortega tabata interna ey aden, pero e no tabatin famia na Aruba.

P’esey nan a tuma contacto cu e asociacion aki. Ademas e persona aki, kende tabatin mas cu 20 aña residencia na Aruba, nunca por a drecha su documento of permiso di estadia. Pues e no tabatin un status legal na Aruba. For di e momento ey, ASOCOL a carga cu e inkietud di kico ta bay pasa unabes cu Sr. Ortega fayece, locual ta e situacion actual.

Fernandez a declara cu nan a inicia un campaña di recaudacion di fondo pa cubri tur gasto rond di e servicio funerario. “Aworaki nos ta bezig den e carera pa por cera e placa necesario pa nos por cumpli cu e acto humanitario aki, y duna e meneer aki un descanso eterno, manera mester ta” a bisa.

E gasto aki ta alrededor di 4 mil florin. El a gradici e cas funerario Aurora cu a duna e asociacion un prijs di consideracion, debi na e caso humanitario aki. Tur esaki ta encera gasto di cremacion y entiero. Te na momento cu e entrevista aki a tuma luga, ASOCOL no por a localisa e difunto su famia na Colombia.

Masha poco informacion ASOCOL tin di e persona morto. E tabata traha den construccion, aparentemente riba su mes. E poco informacion cu nan a logra compila nan a mand’e pa Cartagena pa asina medionan di comunicacion divulgu’e. Nan a haci’e via un otro persona cu ta bin for di e ciudad historico aki. “Te ainda nan famia no a reacciona,” Fernadez a bisa. Si nan ta reacciona e ora nan ta busca e manera pa manda e shinishi di nan ser keri pa Colombia.

Presidente di ASOCOL ta reconoce cu e recaudacion di fondo pa e acto humanitario aki no a bay facil. Comunidad di Aruba en general ta uno generoso, y semper nan a sa di yuda den caso di calamidad asina. Pero awor cu e coronavirus crisis a dal nos lagando hopi hende sin trabao y den necesidad, no ta facil pa recauda fondo. Fernadez a bisa cu meymey di e crisis aki, tog tin hendenan cu ta mustra nan bon curason.

Nan a parti urna den cinco luga pa recauda fondo caminda hendenan ta contribui, y otronan ta haciendo uzo di nan cuenta bancario. “Semper nos comunidad ta hopi solidario cu otro. Nos no por kita esey…” el a declara.

Nan cuenta ta 7700000044851062 di RBC na nomber di e asociacion mes. E urnanan ta situa na Espina de Oro, Fruteria Virgilio, Fruteria La Economica, Chalo Burger y Willi Pan.

Seguro di entiero
ASOCOL a purba di bin cu un tipo di seguro di entiero y repatriacion di e resto di e difunto, manera e Fundacion Arubanse Dominicano Juan Pablo Duarte a yega di hacie, pero te ainda e no a wordo concretisa.

Fernandez ta haya cu esaki ta un forma necesario pa atende e tipo di calamidad aki, sin mester di recuri na e bon boluntad y generosidad di nos comunidad. El a bisa cu un factor importante ta cu na Sto. Domingo ta existi e tipo di seguro aki cu ta yuda e comunidad Dominicano na Aruba di por haci uzo di dje.

E mes a purba di haci e tipo di gestion aki na Colombia. Fernadez a acerca algun companianan di seguro y tambe cu companianan local, pero e problema tin di haci cu e gasto di repatriacion ta demasiado costoso. Esaki ta haci cu niun seguro kier duna cobertura na e tipo di gasto aki.

Te hasta den e caso di Sr. Ortega prome cu el a fayece, ASOCOL a acerca algun compania pa cera un seguro p’e, caminda e asociacion tabata para responsabel, y te hasta transferi e seguro pa otro persona si tabata necesario. Pero e no a bira posibel.

Tin compania di seguro cu ta duna e opcion di cremacion locual ta facilita e transportacion di e shinishi. Pero e ta haya cu e aspecto cultura di nan hendenan ta hunga un rol. Nan no ta mira e parti di cremacion como algo di nan cultura.

Ilegalidad

E caso di e difunto aki no ta uno singular. E hecho cu un persona por a permanece ilegal pa mas cu 20 aña na Aruba, e ta algo cu por sona straño, pero e no ta un situacion no comun, segun Fernadez.

E ta kere cu probablemente e situacion aki ta mas comun di loke mester ta. ASOCOL a yega di topa cu situacion di personanan cu tin añanan na Aruba, sin status legal y trahado. Nan ta casi invisibel den nos comunidad, pero nan t’ey si.

Unabes cu nan tin basta aña bibando na Aruba, nan sentido di pertenencia ta bira mas grandi, y ta dificil pa nan bandona boluntariamente nos isla. Independientemente cu gobierno por ofrece un amnistia pa nan por bandona Aruba boluntariamente, e ta dificil pa nan acepta di bay, despues cu nan a biba hopi aña akinan, segun presidente di ASOCOL.

E ta haya cu un persona cu ya tin caba cuater pa cinco aña estableci na Aruba, nan a organisa nan mes akinan, y tambe nan mentalidad a cambia. “Nan a bin na otro sociedad… y mi no ta kere cu facilmente e por bay bek,” a bisa.

Sinembargo nan status ilegal ta haci di nan un persona vulnerabel. Na momento cu ta pasa algo cu nan, manera e caso di difunto Sr. Arnulfo Ortega, nan no tin acceso na niun tipo di proteccion social cu ley ta prescribi. E fastioso di henter e situacion aki ta, cu eventualmente Sr. Ortega (d.f.m.) a traha cu diferente compania of persona. Pero na final el a traha ilegal riba su mes.

Fernandez ta haya cu esaki ta un aspecto cu sa di sosode, caminda hendenan di afo cu a yega di traha cu un persona of compania cu nunca a percura pa drecha nan permiso. Esaki ta conduci cu e mesun trahado aki, despues di conoce e mercado, ta dicidi di sigui traha riba su mes. Pero nunca nan ta zorg pa drecha nan status na Aruba. Tampoco nan no ta cumpli cu tur nan obligacion di belasting.