14 organisacionnan cu ta representa sector priva na Corsou a manda un carta pa expresa nan acuerdo cu e condicionnan estableci pa gobierno Hulandes di e landspakketnan y lanta e entidad di reforma Caribense.

“Nos ta haci un yamado pa no desaproba e condicionnan den e pakete, pero pa sinta na mesa cu Hulanda pa mehora e pakete unda ta posibel pa tur partido”, e organisacionnan ta skirbi den un carta na prome minister Eugene Rhuggenaath.

“E ayudo di Hulanda pa reforma y pa saca nos pais di e crisis sumamente profundo cu nos a cay den dje ta esencial y mas ainda e ta manda un señal cu nos ta dispuesto pa traha hunto y cu nos lo hacie hunto, cual ta mesun importante.”

E carta ta firma pa Asogas/Copda, BVCA, CCDA, Cifa, Chata, CMA, CRA, DMO, Imana, KvK, PMD, SKO y Suvecu. Anteriormente e asociacion di sector priva na Corsou a saca un comunicado unda nan a indica cu nan ta pro e pakete presenta pa gabinete Rutte Hulandes.

E carta ‘no ta intenciona pa insulta bo gobierno’ e 14 organisacionnan ta skirbi, ‘ni cualkier otro gobierno’. “Nos ta conclui sinembargo cu nos pais no tin suficiente capacidad pa implementa e reformanan necesario y grandi nos mes. Cu un porcentahe halto di desempleo, economia den krimp di mas o menos 20 porciento y miles di persona cu ta depende di pakete di cuminda pa sobrevivi, aworaki no tin tempo ni espacio pa experimenta cu nos mesun reformanan, cual den ultimo 30 pa 40 aña nos no a haci. E necesidad y e urgencia simplemente ta demasiado halto.”

Of, manera varios partido a expresa den ultimo simannan: “autonomia no ta yena stoma.” E organisacionnan cu a firma e carta a indica cu nan no tin ‘niun problema cu e puntonan den liña grandi di e consensusrijkswet, e zelfstandig bestuursorgaan y e landspakket’.

E organisacionnan ta indica cu por ehempel den caso di e landspakket, esaki ta basa – den gran parti – riba e acuerdo di crecemento (Groeiakkoord) y pa via di esey ya por wordo considera como un proposicion cu localmente a wordo acepta. E grupo ta señala alabes na ‘Ban Sembra Awe pa Kosecha Mañan’ cual a wordo presenta pa sector priva anteriormente.

Nan a expresa alabes cu “nos lo gusta wak, banda di e reformanan local, reformanan riba nivel di Reino pa asina haci e ehercicio aki uno sostenibel. Reformanan economico importante riba nivel di Reino ta entre otro estimulo di un circulacion liber di capital, producto y persona entre e paisnan den Reino (ampliacion di mercado) y colaboracion mas amplio riba nivel di enseñansa, husticia y salud.”

E 14 organisacionnan ta señala cu no por subestima e señal fuerte cu un colaboracion entre Reino den sector di migracion, turismo, sector finaniero, inversionnan di exterior, entre otro. “E manera di ‘slikken of stikken’ dentro di 4 dia no tabata aceptabel, pero alabes ta conta cu den cada cas lo tin poco desigualdad cu hunto nos mester mira con ta yega na caminda pa haci nos tur mas feliz.”