ATHA (1).jpg

ATHA ta celebrando su di trinta aniversario cu un “fundraising dinner & auction” dia 24 di september proximo na White Modern Cuisine na Gold Coast.

 

ATHA a wordo funda dia 20 di mei 1986 cu e meta pa contribui na desaroyo di e hubentud Arubano. Esaki ta sosode pa medio di programanan recreativo, educativo y social.

ATHA ta un asociacion cu ta conta cu miembresia di 50 diferente instancia of grupo den nos comunidad cu ta dedica nan mes na e bienestar di e hoben entre 4 pa 21 aña.

 

E miembronan ta entre otro FAVI, AJMG, Asociacion Sonrisa, APG, YMCA, Centro di bario Playa Pabou, Parlamento Hubenil, Traimerdia Sonrisa, Scouting Aruba, Imelda Hof, Wit Gele Kruis, Casa Cuna. E instancianan aki por conta cu ayudo di ATHA pa un programa cu ta regarda specificamente e bienestar di e mucha. Por ehempel ta yuda organisa y of subsidia curso pa profesionalnan di Wit Gele Kruis cu ta encarga cu cuido di baby y mucha.

 

Ta enfoca tambe hopi ariba e formacion di e lidernan cu ta traha cu hobennan cu limitacion mental. Den e caso aki ta ofrece e training di ‘Licht Verstandelijke Beperking’ (LVB) na trahadonan social, agentenan policial, empleadonan di KIA, funcionarionan di departamentonan di Recurso Humano na hotel, enfermeronan na PAAZ y psycholoognan. E cursonan aki ta yuda e personanan concerni conoce miho un persona cu limitacion mental. Dia 26, 27, 28 di september proximo lo tin e training avansa di LVB pa esunnan cu a participa na e training basico. Pa mas informacion tocante e LVB-training por bishita nos facebook na ATHA Aruba. 

 

Durante aña ta sostene tambe diferente programa vacacional recreativo pa hobennan.

ATHA no ta haya subsidio pa su proyectonan, e ta depende di e contribucion di su miembronan y su propio actividadnan pa recauda fondo manera e tradicional bendemento di carchi di Pasco y carchi di Aruba.

Proximamente lo inicia e accion di bendemento di carchi y manera semper ATHA ta conta cu cooperacion di henter e comunidad pa yuda e organisacion recauda fondo pa e sigui cu su trabounan na bienestar di e hubentud Arubano.

 

Pa “fundraising dinner & auction” por tuma contacto cu oficina di ATHA via tel. 582-3773 pa cumpra carchi pa e anochi cu gastronomia Italiano y su ‘wine pairing’ prepara pa chef Urvin Croes na White Modern Cuisine. Prijs pa carchi ta $100,-  Reserva di bo awe mes, pasobra cupo ta limita

Den un sociedad unda hobennan por bira victima di influencianan negativo, ta na su luga pa sigui sostene trabounan pa hubentud. Trabounan recreativo, educativo y social cu ta yuda e hoben crece bira un bon ciudadano, bira un lider responsabel cu por guia su pais den futuro.