Mediante un carta dirigi na ministro encarga cu Salud Publico, Asociacion di Specialista Hospital di Aruba (ASHA) a bati alarma encuanto e situacion den cual cuido medico specialisa ta actualmente. “Cuido medico specialisa pa pacientnan ta coriendo peligro grandi na e momento aki na Aruba. Ta trata di un situacion cu pa basta tempo ta andando, pero cu e candela reciente el a yega na un punto dramatico,” e carta ta bisa, entre otro.

Segun e carta, na e momento aki, a consecuencia di e candela y e asbest cu a sali afor, e capacidad di cama ta asina dramaticamente reduci, cu actualmente e pacientnan di tur e 8 departamentonan ta drumi riba solamente 4 seccion clinico. Pa via di esaki por duna solamente cuido na esnan cu mester cuido urgente o cu ta den peligro di bida. E cuido aki ademas ta sub-optimal pasobra no tin actualmente ningun seccion di intensive care y pacient cu mester di ICU ta ser acomoda y trata na un seccion regular clinico. Esey banda di e hecho cu actualmente no por cumpli di ningun manera cu e medidanan imponi pa e crisisteam nacional den cuadro di e pandemia di Covid-19. “Hospital actualmente pa e motibo aki no por duna cuido adecua na e propio poblacion di Aruba y mucho menos na turista ora frontera habri atrobe,” e carta ta continua.

“E actividadnan di construccion durante e ultimo añanan a conduci na varios calamidad den y alrededor di e hospital, unda entre nos como specialista medico cada vez atrobe ta keda sorprendi cu for di SOGA no tin ningun nocion di e consecuencianan desastroso cu esaki tin pa cuido di salud. Problematica alrededor di e sistema di airco, leknan cu un seccion di emergencia bao awa y como punto mas grave e ultimo candela, ta ehemplonan di e mismanagement di SOGA, cu consecuencia grandi pa cuido di pacient. Ta parce cu ta existi otro interesnan cu literalmente ta costa bida, unda pa nos ta keda un misterio cu gobierno ta sigui tolera esaki y no ta interveni.”

“E situacion financiero di hospital pa hopi tempo ta masha penoso, sin embargo a traves di e sucesonan di ultimo mitar aña, esta e ICT hack, e pandemia di Covid-19, e medidanan di austerisacion y awor e reciente candela, e problemanan directo di cash flow ta crece di tal forma cu directamente na pia di trabao tin mas escasez ainda di personal y material,” e carta ta continua.

“Finalmente nos kier menciona cu nos ta sumamente preocupa pa e medidanan di austerisacion cu AZV ta tuma, cu ta trece e cuido mas den peligro ainda. Esakinan a ser tuma sin ningun transparencia, consulta o participacion di banda di medico y posiblemente a corto plazo lo por duna algun beneficio financiero, pero mas a largo plazo esaki lo mina cuido di salud na e isla y cu esaki lo bay costa mas placa.”

“Henter e cuido di salud ta na peligro grandi pa via di, di un banda calamidadnan no previsto (manera e pandemia di Covid-19) y di otro banda calamidad cu ta consecuencia di un managment deficiente o no adecuado (na nivel micro-, meso- y macro). A pesar di e señalnan di alarma na repitido ocasion for di Raad van Bestuur, ASHA y diferente otro asociacion profesional, ta parce cu te awe no ta mira e gravedad di e situacion.”

Mescos esnan cu ta suministra cuido, UO AZV y e mandatarionan politico ta carga responsabilidad personal pa garantia di calidad, seguridad y continuidad di cuido di Pais Aruba. Sin embargo, mirando e circunstancianan actual nos no por y lo no carga responsabilidad (mas) pa e daño cu cuido ta sufri y lo sufri ainda. A pesar di tur e limitacionnan (imponi) naturalmente nos lo keda duna e mihor cuido cu segun circunstancia nos por brinda.”

E carta ta termina haciendo un yamado urgente pa haya un reunion cu conseho di ministro.