Asociacion di Prensa Hulandes cu carta pa prome minister Wever-Croes

Den ultimo dianan a mira un enfrentamento entre medionan di comunicacion local y gobierno tocante e toque de queda cu a keda implementa tur dia for di 9pm te cu 6am. Asociacion di Prensa Hulandes (NVJ) a manda un carta pa prome minister pa urgi premier inclui miembronan di prensa como personal di prome necesidad.

Segun un relato di Leoni Schenk di Caribisch Netwerk, diabierna ultimo miembronan di prensa Arubano a reuni pa protesta contra e decision, y a entrega un carta na NVJ, polis, y OM. Sinembargo, prome minister Evelyn Wever-Croes ta di opinion cu e toque de queda no ta impedi derecho di libertad di prensa.

Esaki pasobra polis lo tene pueblo informa durante e orario di toque de queda, y prensa por traha for di cas.

Na Hulanda, prensa ta forma parti di sector y profesion cu ta crucial, y ta tene cuenta cu e posicion special di prensa. NVJ ta adverti Wever-Croes den e carta cu precisamente durante crisis di coronavirus, periodistanan tin un rol clave pa provee informacion independiente. “Nos ta urgi pa tambe na Aruba proporciona esaki lo mas pronto posibel”, NVJ ta bisa den e carta na Wever-Croes.

Mientras cu periodistanan mester por identifica nan mes como profesional a traves di un badge, na Aruba no tin un badge oficial di prensa via un asociacion di prensa. Periodistanan riba islanan di Reino Hulandes no ta cay bou NVJ, ni tin un asociacion pa representa interesnan di prensa. Wesley Francisco, miembro di hunta di NVJ, a bisa Schenk cu pa manda badge di prensa na e islanan na e momento aki ta logisticamente imposibel. “Pa e motibo aki, periodistanan riba e islanan cu ta traha pa un compania di media renombra por inscribi cerca mi pa un carchi di prensa digital temporal. Esaki por print of tene riba nan celular”, Francisco a bisa, agregando cu den futuro NVJ lo fungi como mentor pa yuda periodistanan riba e islanan.

Ademas, segun un relato di Sharina Henriquez di Caribisch Netwerk, prensa Arubiano ta sinti su mes censura door di e toque de queda. Maske durante anochi, agentenan di polis en berdad a comparti noticia di suceso a traves di nan pagina di Facebook, hefe di polis, Andrew Hoo a bisa durante un combersacion di prensa cu a leak cu e ta contra toque de queda pa periodista, y cu el a lucha ‘te unda mi por’ contra esaki.

Periodistanan ta reclama cu ‘gobierno ta haci comosifuera e virus ta mas activo durante anochi cu den dia’, segun Henriquez. Mientras cu durante weekend, periodistanan di 21 medionan di comunicacion a purba un biaha mas di sinta na mesa cu Wever-Croes, un gran cantidad a protesta. Nan no ta haya e ponencia cu ta pone restriccion riba prensa pa contene transmision di e virus como uno valido. Durante dia e periodistanan si mag di ta riba caya.

Mientras tanto un grupo chikito a manda un carta pa Wever-Croes expresando cu lo boycott conferencia di prensa – entre otro comunicacion di gobierno – te cu yega na un solucion.

E carta aki a causa un reaccion enorme riba Facebook, despues cu trahado di Wever-Croes, Joally Croes a publica esaki riba su cuenta riba e red social. El a critica e miembronan di prensa pa comporta ‘infantil’ y no realisa e seriedad di e crisis.