E bandera di Aruba ta figura entre esunnan di e paisnan cu ta miembro y/of paisnan asocia na e Asociacion di Estado di Caribe (AEC) cu a conclui su reunion cumbre na La Habana, Cuba, dialuna ultimo.
Na final nan a bin cu un declaracion titula Declaracion di La Habana y Plan di Accion di AEC, caminda nan a reafirma e importancia di aplica e proposicion di Proclama America Latino y Caribe como Zona di Paz. Nan a bin cu e proposicion aki den cuadro di e reunion cumbre di CELAC na 2014.
Durante e acto di clausura di e VII Cumbre di AEC, Presidente di Cuba, Raul Castro a denuncia cu un ola nobo di “neo liberal” ta purba di des articula e politica social, aumenta pobresa y desigualdad, falta di proteccion ambiental y disminui e rol di Estado pa impedi e cumplimento di e obhetivo regional di integracion.
E mandatario Cubano a haci un yamada pa e paisnan di nos region busca solucionnan nobo y factibel, pa asina tur teritorio di Caribe lo por enfrenta e desafionan regional manera e problema di conexion aereo y maritimo. Tambe e problemanan cu tin di haber cu cambio di clima, elevacion di nivel di lama, horcannan, yobida intenso, erosion di costa y trabou urgente pa reduci e riesgo di desaster natural.
AEC a wordo crea dia 24 di juli 1994 den cuadro di e firma di e Convenio Constitutivo na Cartagena de India, na Colombia. El a wordo crea pa promove e consulta, cooperacion y accion conhunto den e teritorio Caribeño. AEA ta integra pa 25 pais miembro, nan ta: Antigua y Barbuda, Bahamas, Barbados, Belice, Colombia, Costa Rica, Cuba, Granada, Guatemala, Guyana, Haiti, Honduras, El Salvador, Jamaica, Mexico, Nicaragua, Panamá, Republica Dominicana, San Cristóbal y Nieves, Santa Lucía, San Vicente y las Granadinas, Surinam, Trinidad y Tobago y Venezuela. Mientras cu nan tin shete miembronan asocia: Aruba, Curaçao, Guayana Frances, Guadalupe, Martinica, St. Maarten y Isla Turcas y Caicos.
E di VIII Reunion Extraordinario di AEC lo tuma luga na Republica Dominicana, unda nan lo bin cu un simposio tocante preservacion di Lama Caribe.
