Asociacion Amigos de Colombia a pidi pa formado cu DIMAS y DPL mester mehora nan servicio

Ayera mainta durante un encuentro cu prensa di diferente stakeholders den relacion cu e topico di migracion nan a trece cierto puntonan dilanti na e reunion cu formado pa loke ta trata e formacion di e proximo gobierno.

Un di nan tabata Asociacion di Amigos de Colombia na unda su presidente Moises Fernandez a expresa cu e reunion cu formado den caso aki minister presidente demisionario Evelyn Wever-Croes y otro ministernan cu tabata presente a bay hopi bon, asina mes el a expresa cu diferente preocupacionnan cu e comunidad Colombiano tin a wordo scucha y treci dilanti.

El a sigura cu nan a menciona diferente punto cu ta hopi importante cu ta remarca necesidadnan cu e grupo aki ta experimenta na e momentonan aki, el a expresa cu Aruba tin un cantidad aproxima di entre 22.000 pa 23.000 ciudadano Colombiano cu ta forma parti di e comunidad.

“Na e momentonan aki nos ta experimentando, nos ta recogiendo informacionnan di e necesidadnan di e grupo cu algun di nan mester di un permiso di trabou y otronan cu ta pasando pa necesidadnan basta fuerte”, Fernandez a sigura.

Den esaki, el a afirma cu tin di haber cu renobacion di permisonan di trabou, asuntonan di salud cu ta mara na validez di nan permisonan di trabou y otro puntonan cu tin pendiente, tambe el a señala cu ta existi un preocupacion pa loke ta trata e situacion di DIMAS y DPL “cu no ta cay den mesun pagina y cu e grupo di personanan aki cu ta contribui y cu ta forma parti integral di e comunidad Arubano ta wordo perhudica di un manera basta grandi”, el a bisa.

Tambe el a indica cu nan a toca e tema di hobennan cu a nace na Aruba, yiunan di migrantenan y algun otronan cu a bin Aruba for di chikito cu tin un bida forma caba of nan ta cabando scol y cu pa via di tur e retraso cu tin den e procesonan di renobacion di permiso di nan mayornan of di nan mes nan no por sigui avansa pa loke ta trata un educacion superior.

Fernandez a indica cu mas o menos 7.000 persona di nacionalidad Colombiano tin mester di un permiso di trabou na e momentonan aki y cu na final di dia nan mes mester a soluciona tur nan inconveniente durante e situacion di pandemia di aña pasa y nan como asociacion tabata envolvi den e proceso aki pa yuda comunidad, ademas cu tambe a ricibi ayudo di algun instancianan.

Un di e solucion pa e problema aki, segun Fernandez a menciona ta cu e dos departamento specifico aki mester ta den mesun ministerio pa asina tur cos por cana manera mester ta, pa motibo cu loke nan ta experimentando ta ineficiencia di e departamentonan aki.