Diahuebs mainta den un conferencia di prensa prome minister Evelyn Wever-Croes (MEP) a duna un actualisacion pa locual ta trata e situacion Venezuela aki na Aruba.
Frontera cu Venezuela ta cera desde mei, y riba dia 10 di juni a prolonga pa tres luna, mientras preparando e proceso mehora pa atende cu frontera den caso cu lo habri esaki bek cu un plan di contingencia.
E mandatario a splica cu ta den contacto regular cu departamento di asunto exterior di Hulanda y cu Corsou, pa asina cana den e mesun di direccion. “Punto di salida ta cu e frontera cera pa Corsou y Bonaire, tambe ta cera pa Aruba.”
Tocante asistencia di Hulanda, cu a pone placa disponibel pa atende cu e crisis di Venezuela, e ta remarca cu esaki no ta un crisis di e region solamente, pero di henter comunidad mundial. “Pais cu ta bati riba pecho ta bisa cu nan ta pais cu ta semper yuda otro, mester wak direccion di crisis.”
Tin disponibel 23.800.000 euro, cu ta placa cu lo yuda den asistencia di wardacosta, pa controla frontera y intensifica trabou. Tambe training cu a tuma luga mirando cu no tin experiencia pa atende ‘cu tanto aplicacion di asilo’, anto mester wak tur cos wordo cumpli manera procedura, pa motibo cu organisacion internacional ta controla.
Den e unidad, 10 persona a ricibi un entrenamento, anto den esey tin e placa. Sinembargo e mandatario a splica cu a haci apelacion di 5.500.000 euro parti den dos categoria. E prome 3.000.000 lo bay pa reforsa departamento di migracion (DIMAS, wardacosta y otronan). Tambe pa ampliacion di facilidad di detencion, pa asina garantisa derecho humano.
E 2.500.000 euro lo bay pa otro proyecto di enseñanza, pa salud y cuerpo policial. “Nos ta trahando duro den departamento di gobierno pa introduci e plan di acuerdo cu e forma con Hulanda kier pa wordo haci y lo warda contesta.”
Sinembargo, el a continua bisa cu si e 5.500.000 no wordo cubri e gasto di crisis, lo bay Union Europeo, cumpli cu rekisito cu nan ta pidi, y haya ayudo. “Ta birando obvio cu organisacion internacional ta bisa cu nan lo yuda cu fondo disponibel, pero ora di bati na porta y realisa kico ta disponibel, no ta loke mester.”
Den caso di fundacion, manera Hende Muhe Den Dificultad, kier amplia e facilidad, mirando cu tin cantidad di muhe di Venezuela cu ta wordo maltrata, anto lo wak ki ta haciendo. E muhenan aki ta pidi ayudo pa shelter, anto ta bay na e fundacion. Esey ta rekeri cu tambe lo mester mas personal pa traha den dje, sea trahado social, anto esey ta otro gasto.
Segun e mandatario, e caso ta aumenta alarmante. “E cantidad ta procedente di Venezuela. Nan no tin documentacion”, el a splica. Tambe a expresa cu den varios caso, e pareha cu haci e maltrato ta local. Pa e motibo aki lo inclui den e peticion pa asistencia financiero pa amplia e shelter.
