Asistencia financiero a cambio di autonomia; Gobierno ta acusa Hulanda di pone rudia riba nek di Aruba

Aumento di edad di pensioen na 67 aña y introduccion di BTW di 12.5 porciento, ademas di perdida di autonomia riba maneho publico. Esaki ta apenas algun di e condicionnan cu a bira conoci y cu Hulanda kier contesta riba dje, prome cu aproba un fianza di crisis di 204 miyon florin diabierna awor.

“Hulanda a pone nos nek den klem cu ta haci’e imposibel pa hala rosea,” tabata e reaccion di Minister di Finanzas di Aruba, Xiomara Maduro riba e exigencianan aki durante e reunion informativo na Parlamento di Aruba. Su ponencia a keda ripiti den un carta cu Prome Minister, Evelyn Wever Croes a manda pa Prome Minister Hulandes, Mark Rutte unda ta pidi espacio pa publica e condicionnan y tambe habri espacio pa negocia.

E documento di 218 pagina mas 18 condicion fuerte cu segun reglanan di Conseho di Minister di Reino, no por keda publica prome cu trata nan. Pero sin cu Gobierno acepta nan e siman aki, Hulanda lo no ta traspasa e di tres tranche di prestamo di sosten di crisis.

Wever Croes, Xiomara Maduro, Director di Finanzas Derrick Werleman y Director di Direccion Huridico y di Legislacion (DWJZ) George Croes a duna un ilustracion di e bloki di sorpresa negativo presenta na Aruba. Practicamente e ta nifica entrega autonomia a cambio di un prestamo di 204 miyon florin, pa awor.

E papel di Parlamento mester keda na un formalidad, segun e exigencia di Hulanda. Ta cuestion di firma prome cu diabierna y despues pa Wever Croes pa busca sosten amplio pa e proposicion di Hulanda. Un decision cu de facto ta nifica cu Gobierno ta entrega un parti grandi di responsabilidad, finanzas, enseñansa y husticia. Pero e responsabilidad lo no ta bou encargo di Gobierno Hulandes, sino di un Entidad di Reforma Caribense. Y banda di dje, Aruba lo mester cay bou e Rijkswet Financieel Toezicht, RFT cu ta conta pa St. Maarten y Corsou.

Y esaki ta innecesario, mirando cu Aruba ta sigui e protocol di november 2018 cu practicamente ta compromete Aruba na reformanan cu ta describi den e documentonan ricibi, pero cu ainda ta oficialmente secreto. Mas ainda, CAFT cu ta berdad tin su base den ley Arubiano, pero cu ta sigui e mesun supervision y raportahe na Hulanda cu CFT, a duna conseho positivo pa Hulanda duna Aruba e di tres prestamo pa sosten di likides. Motibo ta cu Aruba a cumpli cu tur condicion. E suma di 204 miyon ta pa cubri salarionan, FASE, subsidio di salario, pagonan na APFA, SVB y AZV. A logra e reduccion di cinco miyon mensual di AZV y tambe a kita 40 miyon florin di inversion.

Wever Croes a bisa cu mirando cu segun ley, documentonan cu mester bay den Conseho di Minister di Reino ta secreto, e no por discuti nan contenido ni cu Parlamento di Aruba y ta net esey ta preta. Pasobra e condicionnan ta inclui un cambio estatal enorme y ta pone Statuut un banda. Mirando cu e Entidad Reforma Caribense lo tuma decision riba fondonan di Aruba y no tin cu duna cuenta na Parlamento di Aruba.

E Entidad Reforma Caribense lo ta dirigi pa e Cuadro di Ley Zelfstandig Bestuursorgaan, ZBO.

Un ZBO ta ehecuta un trabou di Gobierno di Reino. Den e caso aki e ZBO Reforma Paisnan Caribense tin un posicion special den maneho publico di Aruba y por prohibi of permiti un accion. E entidad ta independiente y no ta someti na un Minister. Y segun e proposicion di Hulanda, ta Gobierno Hulandes lo nombra e miembronan den e entidad, cu ta dirigi pa ley Hulandes. Aruba mes lo no tin nada di bisa den e ZBO en cuestion aki, a pesar cu entidad lo dicidi riba presupuesto di Aruba, lo dirigi e maneho riba enseñansa y determina direccion riba nivel di husticia.

Pa Prome Minister, e ta un situacion incomprendibel, unda Aruba ta cumpli cu e protocol di 2018 cu Hulanda, ta logra un surplus riba presupuesto, y pa motibo di e crisis di Covid19, tambe a acepta condicionnan pisa pa haya prestamo. Asina mes Hulanda awor kier bin cu asina yama landspaketten, cu ta serie di condicionnan generico pa e tres paisnan di Reino den Caribe, pero cu tambe tin algun exigencia specifico pa cada isla. “Riba su mes, e landspakket pa Aruba aki no ta cosnan cu nos no sa di dje. Den nos proposicion di reforma ta menciona nan, cu excepcion cu nos tin un vision pa haci Aruba mas agil. Pero algun di e puntonan cu a sinta Hulanda dwars a hinca den e landspakket.” Pero mucho mas Prome Minister no por a bisa pasobra e mes no a caba di studia henter e pakete di documento, a pesar di kier ta transparente. “Ministerio pa Asuntonan Interior ta insisti pa e secresia y nos ta debatiendo pa kita esaki prome cu diabierna ainda.” Wever Croes a bisa cu asina mes ta sigui cu su plan pa papia cu gremionan y tur partido politico cu a participa na eleccion pasa. “Mi a bisa Hulanda cu den cuater dia no por spera Aruba tuma un decision asina pisa.” Wever Croes ta lamenta con ta trata Aruba di e forma aki, particularmente pasobra e ta bay contra transparencia y principionan di bon gobernacion, cu ta locual “Hulanda henter ora ta yena su boca cune.” Prome Minister a informa e Parlamentarionan cu no tin problema cu supervision, pero si e manera con kier impone e reformanan cu Aruba mes a propone pa gran parti. Y ta haci esaki netamente memey di un crisis sin precedencia cu a afecta henter mundo. “En bes di yuda, Hulanda ta trapa nos mas. Esey nos no por biba cune.” Pero di otro banda, Aruba no tin espacio financiero. Si bisa no na Hulanda, no tin fianza tampoco.

Minister di Finanzas Xiomara Ruiz Maduro ta haya cu e forma con Hulanda kier bin impone condicionnan cu ta mete den autonomia di Aruba y ta afecta su libertad pa determina su maneho, ta un abuso di poder. “Nos merece respet.” E Minister a ilustra con paisnan manera Hulanda a probecha di e Marshall Plan despues di Segundo Guera Mundial, unda a yuda paisnan Europeo den nan recuperacion. Pero ta mustra cu Hulanda ta abusa di Aruba. “E crisis di Covid no ta di salud publico so, pero tambe di liquidez na nivel mundial. “E actitud di Hulanda ta un falta di respet grandi na Parlamento di Aruba. E consecuencianan pa e ciudadano Arubiano, si mester acepta e condicionnan ta a largo plaso. Hulanda ta maluza e necesidad cu tin awor aki. Nos ta na rudia y en bes di ta haya aire, nan ta pone pia riba nek na momento cu mas mester di rosea,” e Minister a expresa, admitiendo cu e comparacion ta hopi duro, pero na su luga.

E hecho cu ta tres experto Hulandes, sin necesidad pa duna cuenta na Aruba lo determina kico ta pasa cu Aruba ta inaceptabel, y sigur si no por comparti detayenan di e condicion di Hulanda, cu ta pone Gobierno dilanti un decision duro. Acepta e fondonan di ayudo y entrega autonomia, of keda sin haya ayudo y confronta e realidad cu pa fin di Augustus no tin fondo pa paga salario publico, ni pa duna asistencia na e 37 mil hende cu ya caba ta sin trabou.