Den nos edicion di e siman aki algun observacion tocante con pa construi o compone un frase bon, cu no ta usa palabra innecesario, pero no ta laga nada di duda tocante e contenido. Sa sucede cu nos ta formula un frase, pero e no mester ta completamente eroneo pa causa posible confusion. Como ehemplo nos ta usa un titulo recien di nos propio medio, pa nos no haya cara rabia cerca e coleganan di otro. E frase ta un titulo di un articulo: “Camaranan kita na warda di polisnan en conexion cu entrega di arma di candela”. A primera vista no tin ningun eror o posible eror den esaki. Sin embargo, e uso di e forma “warda di polisnan” na lugar di “wardanan di polis”, bo lo por lesa e frase na un manera diferente cu ta bisa cu ‘Na warda a kita ‘camara di polisnan na warda’, en conexion cu entrega di arma di candela”…
Awor, esey lo ta loke e noticia kier bisa? Cu a kita camara di polis? Como nota chistoso, e titulo inicial ariba ta bisa ademas: “No tin mas confusion.” No, no ta esey kier bisa, pero e uso di e forma di pone e indicador di plural (‘nan’) tras di e segundo sustantivo na lugar di añadi esaki na e promer: “wardanan di polis” por causa confusion. Den e caso aki e confusion no ta asina grandi, pasobra tur hende ta comprende cu no ta trata di kita arma di polis, al contrario. Sin embargo, imagina un carta oficial, sigur awendia cu nos por comunica por ehemplo cu gobernacion formalmente na Papiamento, den e caso ey lo bo no kier laga ningun duda kico bo kier bisa. Naturalmente den nos conversacion diario nos ta usa e forma menos exacto ey frecuentemente, pero lag’e te ey.
Otro elemento pa tuma na cuenta ora di skirbi ta evita e uso excesivo di cierto palabra, cu ta haci cu e frase cu nos a construi ta mustra ‘pisa’. Esaki por ta consecuencia di usa frecuentemente e palabra ‘e’ sin cu mester. Den un Papiamento bon skirbi nos por evita esey hopi; un ehemplo: “E gobierno a anuncia cu e uso di e rotondenan ta mara na e reglanan di trafico specifico pa e rotonde.” Tin algo malo den e frase aki? Segun bo promer impresion, talvez no. Pero, nos por skirbi tambe: “Gobierno a anuncia cu uso di rotonde ta mara na regla di trafico specifico pa rotonde.” Den e ‘reconstruccion’ aki di e frase manera e tabata anteriormente, nos a traha riba un ‘clean up’ di ‘e’ innecesario, y de paso tambe un par di ‘nan’ cu no mester tampoco, logrando un set up mas limpi, cu no ta perde nada na contenido corecto.
Un elemento di mehoracion di texto ta algo cu nos a yega di trata na varios ocasion, y esey ta e uso innecesario di e ‘wordo’ o ‘ser’ na lugar di usa e forma mas directo di e verbo. Envez di bisa, por ehemplo: “Esaki ta wordo considera un insulto,” por bisa, o skirbi: “ Ta considera esaki un insulto.” Cu esey nos ta bisa cu nos mester mantene nos mes estrictamente na e ultimo forma aki? No, pero sigur ora nos ta skirbi e ta mas agradable si un texto no ta yena cu ‘wordo’ innecesario, y sigur no cu exceso di ‘nan’ acerca. Un manera pa evita ripiti un ‘nan’ cada biaha den un serie di sustantivo, ta mihor pa pon’e solamente na e ultimo den e serie menciona, si ta necesario. Ehemplo: “Nos ta desea di invita muchanan, hobennan, adultonan, y hendenan di edad pa e evento educativo aki.” Esaki ta loke nos kier a bisa cu un frase cu ta ‘pisa’ sin cu mester. Hacie mas liviano: “ Nos ta desea di invita mucha, hoben, adulto, y hende di edad pa e evento educativo aki.”
