Den nos edicion di e siman aki di nos articulo semanal tocante nos idioma nacional Papiamento, algun atencion pa origen di nomber di fruta y berdura, unda nos por detecta atrobe, e amplio diferencia den origen, dependiendo di epoca y di unda e producto tabata origina. Nos no ta pretende di ta completo, lo tin anto nomber cu nos no lo a cubri, pero nos ta pendiente di reaccion di e lector interesa via nos pagina di Facebook.

Un di e frutanan (importa) cu tin un historia bastante largo na nos pais ta e cashu, o casho, (‘Anacardium occidentale’),  cu tin un historia interesante. Den e promer decadanan despues di descubrimento di continente America, e Portuguesnan a cera conoci cu e fruta na Brasil, di cual e nomber ta bin di e idioma indigena di e tribu Tupi, ‘acaju’. Bao di e nomber Portugues ‘cajú’ a exporta e mata pa otro propiedadnan Portugues riba costa di India, por ehemplo, pero tambe na Africa. Aki a bin e cultivo na grandi di cashu, pa e fruta mes y principalmente pa e simiya, cu a haya exportacion na escala mundial.

Aperentemente e nomber na Papiamento ta bin directamente di Portugues, aunke nos no por bisa cu certeza na ki momento a trece e mata na e islanan. Muy probablemente tabatin cultivo di cashu cerca varios famia promer cu inicio di siglo 20, pero nos no por comproba esey. En todo caso, ta sigur cu den promer mitar di siglo pasa cashu tabata un di e matanan di fruta mas cultiva cerca di cas. Tabata pone e simiya na solo, riba dak di cas por ehemplo, pa deshaci di e acido rond di e simiya cu ta hopi agresivo. E grandinan entre nos lo por conta ainda con nan, cu martiu den man, tabata habri e simiyanan un pa un, pa disfruta algo cu awendia nos por cumpra na cantidad casi ilimita na supermercado. Den e era moderno aki, cashu, o cashew na Ingles, ta un producto mundial presente den abundancia.

Curioso ta cu despues, tempo cu a cuminza traha otro producto a base di cashu, a introduci un nomber relaciona cu ta origina na Hulandes: e ‘cashewpit’, o ‘cash’ipete’ cu a bira un di e ingredientenan tradicional pa traha bolo na nos isla. Un di e otro nombernan cu un historia particular ta e mata di fruta ‘shimarucu’ (‘Malpighia emarginata’), conoci den nos region tambe bao di e nomber Ingles ‘West Indian cherry’, ‘Acerola cherry’ y varios mas. E fruta ta existi na gran parti di Suramerica y Centroamerica. Sin embargo, loke a intriga nos mas tabata pa haya sa di unda e nomber ‘shimarucu’ ta bin. Wel, nos no mester a bay leu. Na Venezuela, y sigur riba e parti mas cercano, e peninsula di Paraguana, e fruta ta conoci como ‘semeruco’. Na otro parti mas aleha, na oriente di Venezuela, e ta conoci como ‘cerezita’ loke ta claramente deriva di Spaño: ‘cereza’. Nos no a haya indicacion – ainda – cu e nomber por ta di origen indigena di nos region, ya cu e mata mes ta original di nos region, cu ta inclui tambe e partinan semi-desierto di Venezuela y Colombia, y varios isla di Caribe. Mientras ta elogia e contenido di vitamina C den e fruta aki, su uso ta conoci tambe den preparacion di biña y como bebida fresco. Lametablemente cerca no e uso a keda limita na e consumo directo como fruta.

Ta logico cu e cercania cu Venezuela, y sigur e parti mas cerca nos, estado Falcon, a trece varios nomber mas cu a bira parti di nos Papiamento. Por ehemplo, mientras na mayor parti di America Latino ta papia di ‘sandía’, na Venezuela e fruta ta conoci como ‘patilla’, loke nos a adopta. Igualmente un tipo di bonchi conoci cerca nos como ‘quinchoncho’; esey ta textualmente e nomber na Venezuela, mientras cu e tipo di bonchi aki generalmente ta conoci como ‘gandules’. E quinchoncho (Cajanus indicus) ta originalmente di India y a haya propagacion amplio den nos region. E ta hopi rico na varios elemento nutrutivo, pero tambe su foyonan tin uso medicinal. Di esey mas den un proximo edicion.