E column aki di Bon Dia Aruba a nace di e idea den redaccion pa atende e problema cu nos tabata señala, cu tabata existi caba un idioma structura y formaliza den ley, pero cu den practica ainda tabata existi un variedad inmenso di con pa skirbi nos idioma. Esaki naturalmente tin su motibo, pa cuminza caba e forma con nos idioma a surgi como sintesis di varios idioma cu a bin topa cu otro den nos cas y a bira parti di esaki segun cu nos hendenan den practica di tur dia tabata incorpora espontanemente palabra, no tanto di nan preferencia, sino di nan conocimento limita. Loke nos a yega di trece dilanti na mas cu un ocasion, ta cu nos idioma a nace y crece den un tempo cu acceso na educacion formal tabata hopi limita y cu ademas nos idioma mes pa gran parti di tur e tempo ey no tabata parti di e programa escolar, na ningun nivel. Esaki tabatin como consecuencia cu palabra tabata drenta nos vocabulario, segun e forma di pronuncia – y skirbi – cu e promer usuario a dun’e. E otronan, cu pa mayor parti tampoco tabatin un opcion mas corecto, pa falta di conocimento, no ta coregi y asina e palabra modifica den uso popular ta haya bida den nos vocabulario. Es mas, segun cu ta usa un palabra cu tabata pertenece na otro idioma, den su bida como parti di e vocabulario di Papiamento tambe por conoce version nobo, di cual nos no por bisa mas cu na dado momento ‘un persona’, nos no sa ken, a cuminza usa e palabra den e forma modifica ey.
Pa nos comprende otro bon: esaki no ta un proceso unico, sino algo general cu ta tuma lugar den tur idioma, ya cu casi ningun idioma na mundo ta exclui di influencia exterior. Es mas, nos por considera hasta e idioma mas internacionaliza actualmente, Ingles, como un idioma ‘crioyo’ cu a nace di e encuentro di idioma local cu a mezcla fuertemente cu e vocabulario extenso di idioma Frances, cu su base den e vocabulario Latin. Pues di e banda ey no ta nada straño cu nos ta ‘adopta’ y ‘adapta’ palabra pa uso den nos idioma, y no tin pakico tampoco pa e proceso aki dal para, lag’e sigui su curso pasobra palabra nobo ta drenta nos teritorio y nos idoma casi a base diario y ta aumenta nos vocabulario.
Sin embargo, ora nos ta yega na e punto di desea formaliza nos idioma, hasta den ley, pa crea un base mas manehable den por ehemplo educacion y comunicacion, e deseo ey ta trece cierto obligacion cune. Nos ta obliga di tuma na cuenta kico si o kico no ta pertenece na nos idioma, ademas di con ta skirbi esaki. Kico haci anto? Hiba un politica di puritanismo, nengando entrada na cierto palabra nobo, pa cual talvez ya ta existi su equivalente? Nos en todo caso no ta na fabor di esey, si e palabra o expresion nobo ey ta duna un contenido mas specifico cu e otro palabra, esun original, no ta duna. Manera semper, un ehemplo reciente: nos a cuminza ripara uso di e palabra ‘ingreso’ na lugar, o banda di, e tradicional ‘entrada’ ora ta trata di finanzas, sea personal o di entidad. Con ta mira esaki? Rechaza e uso como algo innecesario? O acepta esaki como un enriquecimento di nos idioma, ya cu e ta duna un uso specifico cu e termino ‘entrada’ no ta duna? Nos ta pensa, y esey naturalmente ta un opinion, cu enriquece nos idioma ta mas importante cu defende loke tradicionalmente ta e forma usa. Ademas, nos no ta pro pa dicta ningun hende con nan mester papia, pero si ta kere tambe cu nos mester ta pro un uso y forma di skirbi consecuente, pa no termina den un libertinahe completo cu lo no beneficia e uso ya menciona den educacion y comunicacion. Ta p’esey nos no ta pro cu ta cambia, sin ningun base, e forma di cierto palabra existente den nos idioma. Por ehemplo, nos no ta mira pakico de repente ta papia di ‘comportacion’, na lugar di e tradicional ‘comportamento’, pasobra esaki no ta introduci un sinonimo cu ta enriquece nos idioma, sino cu e ta parce, cu tur respet, basa riba falta di conocimento di nos idioma. Den e mesun categoria aki ta aparece tambe ‘cargacion’ na lugar di ‘cargamento’, entre varios otro cu nos a mira ultimamente. E tipo di vulgarisacion aki no ta aporta nada positivo na desaroyo sano di nos idioma, y ta segun nos motibo pa pone cierto limite na adopcion di cualkier novedad no bon pensa cu subi plaza. Nos tin un idioma formaliza y structura, of no?
