Diasabra ultimo, na Royal Plaza Mall a tuma lugar e lansamento di e di cinco coleccion di ‘tiles’ (tegel) di Tangerine, e marca crea pa artesano local, Ashlin Ahlip den colaboracion cu artista Cado de Vreede. Durante e lansamento tambe a presenta un video traha pa videografo Ken Wolff, den cual a detaya e concepto di e coleccion, cual ta inspira den autentico historia Arubiano.

Na e evento, Ahlip a tuma un momento pa combersa cu Bon Dia Aruba tocante su inspiracion, su historia familiar, y su ideanan pa futuro.

Su trabao como artesano ta un herencia familiar, ya cu su famia ta den negoshi di tapiceria tradicional desde añanan 1930, 1940. Su welo ta un di esnan cu a cuminsa, y su omo a tum’e over den añanan 1950. E ta segundo generacion, e tin su negoshi ainda banda di PriceSmart. E ta mayor di 80 aña di edad, y ainda ta habri porta tur dia.

A pesar cu tapiceria tabata un artesania generacional den famia di Ahlip, originalmente e no a pensa di bay mesora den e negoshi aki, ya cu su famia tabatin otro plannan p’e. “Tempo cu mi tabata den mi 20 añanan di edad, mi a puntra mi famia si ta okay pa mi bay, al menos siña tapiceria. Y nan a bisa no”, el a conta. Su tata tabata e ruman di mas chikito den su famia, y door di esaki e nunca tabata traha cu e mashin di cose. “Unico cu bo ta haci ta saca niet bieu cu cosnan asina, anto e tabata odi’e tempo e tabata chikito. El a bisa mi: ‘e bida ey no ta un bida cu bo kier. Miho bo bay scol’.” Sinembargo, Ashlin a sinti cu esey no tabata ken e ta como persona. “Mi no tin afinidad academico en absoluto. Pues e ora mi a dicidi, riba mi mes, pa acerca mi wela y puntr’e, ‘bo por siña mi cose algo?’ Pa mi tabata hopi importante pa siña algo cu realmente bo kier siña.”
Y como cu e tempo ey ya caba e tabata trahando full-time, su tata no a opone mas pa e siña.

Loke e tabata kier siña traha tabata carson, y e ta conta cu e por traha carson completo di principio te fin. “Mi a siña di e manera dificil, varios aña, poco poco. Asina mi a siña con pa cose.”

Finalmente tabata en realidad idea di Cado pa traha tas. Ashlin y Cado a colabora den varios proyecto hunto durante ultimo 15 aña, incluyendo Korte Weg y Ducks and Robots. Tabata tempo cu Cado tabatin e tienda Salad Skate Shop cu a acerca Ashlin pa traha tas pa bende.

“Ami a bis’e, mi no ta traha tas. Mi no tin relacion cu tas. Pero mi ta bay traha un tas pa bo.” El a traha e tas y esaki a keda bon, pues hende a cuminsa pidi pa mas.

Hefe di Ashlin e tempo aya ta traha boto di palo como hobby. “E ta un tremendo artesano”, Ashlin a bisa. Regularmente e ta bay na Maine, Merca, pa siña artesania di boto. Den e scol ey tabatin un curso tambe di trabao cu canvas, y a invita Ashlin, pa participa. Conoce e comunidad di artesano di boto tabata asina impresionante – “tur hende cu ta siña bo e arte, ta e hendenan cu a skirbi e buki” – cu el a sinti cu tabata imposible pa bay back na su bida regular, un experiencia transformativo. “Mi tabata sinti cu mi mester ta parti di e comunidad aki.” Y asina el a crea su prome tas, e ‘bucket bag’, cu di paden ta di bela di barco (material fuerte pero cu no ta embehece bon) y di pafo ta wax canvas (cu ta embehece bunita).

Asina por nota e profundidad di e diseño di e tasnan di Tangerine. “Pa cinco aña mi a traha carson, y mi tabata solamente interesa den siña cose. Ora mi a traha e tasnan aki di Tangerine, mi a sinti cu mi tin un proposito.”

Door di ta parti di e comunidad di artesano di boto, Ashlin a siña traha pa pasion. “E comunidad ta hopi apasiona, pasobra no tin sentido. E tabatin sentido añanan atras tempo cu no tabatin fiberglass, pero unabes cu plastic y fiberglass a aparece – un boto di plastic y fiberglass ta bay dura hopi mas cu un boto di palo. Pero e personanan aki ta asina apasiona pa e artesania di traha boto, cu mi a pensa cu ami tambe mester ta asina. Mi no mester ta pensa riba cosnan desechable.”

Bon Dia Aruba a puntra con a yega na e coleccion di tegel di Aruba. “Cado a bisa mi pa colabora riba un tas. Pero ami ta un hende hopi dificil, mi mester tin e vision pa por ehecuta esaki. Mi kier pa e make sense.” Asina mes, Cado a bin cu centenares di idea pa nan colabora ‘casi un bes pa luna’, pero niun tabata convence Ahlip. Pero un dia el a bin cu idea si por print un potret riba PVC of cualkier material, tambe mester por riba canvas pa cose un tas.

Prome cu esaki, e tabata traha cu colornan solido so, ‘mi no a ni considera pone un grafico riba mi tasnan’. Asina a traha un par di tas usando potretnan cu Cado tabatin caba, y esakinan a haya un tremendo acogida.

Unabes nan a comproba cu por pone grafico riba tas, a bin cu idea pa usa e patronchinan colorido di tegel di Aruba. Ashlin a splica cu loke mas a inspir’e di e tegels ta cu door di usa diseño grafico por isola cualkier color den e tegel y cambia esaki, locual ta crea posibilidadnan infinito di diseño. “Asina mi a pensa mi por haci esaki pa centenares di aña y nunca haci e mesun cos dos biaha.” Na e momento ey Cado tabata entusiasma y a sostene e idea. “Esaki ta nos di cinco coleccion hunto”, Ashlin a bisa. “E ta un progresion, igual cu tur cos na bida. E prome a print na Aruba, e calidad no tabata dje bon – e tabata mustra great pa loke ta vintage, pero no tabata algo cu ta bay dura.” Asina el a purba print na Merca – no a bay bon; na Canada – no a funciona. “Y finalmente un amigo di mi a haya un mashin nobo – na Aruba! El a bisa mi: ‘duna mi un siman y mi ta bay purba haci lo miho posible, unico cos ta cu no por print riba canvas sino riba polyester.” Esaki a pone Ashlin duda, pasobra polyester no ta un tela sostenible – maske si e ta duradero. Aki ta unda e colaboracion ta bin aden. “Ami ta stima e tela, pero Cado como fotografo kier e imagen mas skerpi posible. Esaki tabata por solamente riba polyester, y esey ta e motibo cu nos a scoge pa esaki.”

Ashlin a bisa cu e idea pa traha un video a bin di Wolff mes, ken e ta admira pa su vision unico como filmografo. E prome video – den un serie di tres – ta bay ta disponible for di awe riba YouTube di Wolff.

Pa finalisa, Bon Dia Aruba a puntra kico su tata ta pensa awo tocante su escogencia. “Mi tata ta ouderwets ainda. E ta stim’e y e ta hopi contento cu mi por biba haciendo esaki. Pero e ta pensa cu si bo bende mas, bo ta genera mas. Pero ami ta e sorto cu mi ta prefera di ta feliz.”

E coleccion di Tangerine ta disponible na segundo nivel di centro comercial Royal Plaza. Por sigui Tangerine riba su paginanan di Facebook facebook.com/tangerinearuba of Instagram @tangerine_aruba.